BADA' RATNAN UKUM 9 - BALA LUK DO'

Lun Israil Ngelaba Ukum Tuhan

¹ “Ninger, O lun Israil! Nekini muyuh guta Abpa' Yarden, pad ngelaya' tuda'-tuda' pupu luk meluun rayeh idi meluun tueh rat nemuyuh. Idi bawangdeh pelaba rayeh idi libung bawangdeh pana' macing langit.

² Pupu ineh lun luk medita' idi rayeh burur. Idi muyuh pangeh neninger bala rat nedeh kudeng ini, seburur pana' nateh luk miak metueh rat nedeh.

³ Iamo' muyuh miak kali' aco sini pana' Tuhan Allah muyuh luk nalan pa atun muyuh mepad kudeng apui. Idi Ieh miak ngelaya' nedeh pa kiung muyuh, pad muyuh ngusu nedeh, idi ngaté nedeh dengan mesaget, maya' kudeng luk bilaNeh nemuyuh.

⁴ “Kareb Tuhan Allah muyuh pangeh nengusu nedeh rat pa kiung muyuh, aleg muyuh ngerawé kudeng ini, ‘Ngaceku lalud kai sebuleng idi Tuhan pangeh nenguit nekai semuet idi tudo bang tana' ini.’ Iamo' Tuhan luk ngusu nedeh pa kiung muyuh, ngaceku pupu ineh dat.

⁵ Idi baken ngaceku muyuh matu idi teteb niat muyuh, idi muyuh semuet bang bawangdeh, iamo' ngaceku dat pupu-pupu ineh idi Tuhan Allah muyuh ngusu nedeh rat pa kiung muyuh, pad Ieh ngacing bala luk pangeh pijani'Neh kuan tepun muyuh Ibrahim, Isak, idi Yakub.

⁶ Iamo' do' muyuh kali' Tuhan Allah muyuh maré tana' luk do' ineh kuan muyuh, baken ngaceku muyuh matu. Ngaceku muyuh aceh pupu luk metueh niat.

⁷ “Aleg muyuh kelupan amung kekamen muyuh luk nengeruat useh Tuhan Allah muyuh déi' su luk ali-ali, ieh ineh ngimun rat aco muyuh neremuat rat bang bawang Masir, pad muyuh macing su ini, muyuh megateh inan Tuhan.

⁸ Déi' Pegkung Sinai pana' muyuh pangeh nengeruat useh Tuhan, pad Ieh pian ngaté amung muyuh.

⁹ Ui nuké luun pegkung idi nengalap dueh balad batu, ieh ineh balad batu pejani' luk pangeh inau' Tuhan kuan muyuh, idi ui tudo luun pegkung ineh apat ngepulu' aco apat ngepulu' dacem kinioneh. Ruti pana' nateh kinanku, abpa' pana' nateh inirupku.

¹⁰ Idi Tuhan nemaré negku dueh balad batu ineh, inayud ku ticu'Neh, idi luun ineh pangeh inayud amung bala luk bida' Tuhan nemuyuh déi' luun pegkung rat uned apui, kareb lun mula' ineh nepamung.

¹¹ Idi pangeh apat ngepulu' aco apat ngepulu' dacem ineh Tuhan nemaré kuanku dueh balad batu, ieh ineh balad batu pejani' ineh.

¹² “Idi kebala Tuhan negku, ‘Mudur iko, musul rat ieni dengan mesaget, ngaceku pupumu luk pangeh inuitmu remuat rat bang bawang Masir ineh pangeh nenganau' luk dat idi pangeh numai ratnan dalan luk inanKu neperiteteng namu. Ideh pangeh nemudut aceh akang luk inurai.’

¹³ “Idi teh kebala Tuhan negku, ‘Ui kali' pupu ini aceh pupu luk metueh niat.

¹⁴ Nima' Negku pad Ui ngaté nedeh idi nala' ngadandeh rat pa liang langit. Idi Ui pian nganau' namu ku aceh pupu luk meluun tueh idi meluun ula' ratnan pupu ini.’

¹⁵ “Pangeh ineh idi ui nelemubed idi musul ratnan pegkung. Idi pegkung ineh pana' mebudung ku apui. Idi dueh balad batu ineh idi bang paladku.

¹⁶ Idi ui nenier nemuyuh petacu na maya' bala Tuhan Allah muyuh, pad muyuh nemudut aceh anak sapi' luk inurai ku akang muyuh.

¹⁷ Idi ui nemepet batu luk dueh balad ineh idi ineh nebila' pa kiung muyuh.

¹⁸ Idi ui netekeradung sembayang pa kiung Tuhan maya' kudeng luk atun, apat ngepulu' aco apat ngepulu' dacem kinioneh. Na ui nekuman idi nengirup anun-anun pana', ngaceku ratnan amung sala' luk inau' muyuh, pad ngeruat useh Tuhan.

¹⁹ Ui matot ku useh Tuhan nemuyuh, ngaceku Ieh pian ngaté nemuyuh amung. Iamo' Tuhan neninger negku sekua' ini teh.

²⁰ Idi Tuhan pana' meluun useh ni Arun, pad Ieh pian ngaté neneh. Iamo' bang kareb ineh pana', ui nesembayang kuan Arun.

²¹ Idi pudut luk ku sala' muyuh, ieh ineh anak sapi' luk pangeh inau' muyuh, ilapku idi ui nengeseb ineh idi inaregku bunek-bunek, idi abuhneh tila'ku bang arur luk manud ratnan pegkung ineh.

²² “Idi déi' Tabera, Masa, idi Kibrot Hatawa pana' muyuh nengeruat useh Allah.

²³ Idi kareb Tuhan nengecuk nemuyuh nalan rat Kadis Barnia, pad ngalap tana' luk barénNeh nemuyuh, idi muyuh metueh niat idi na maya' bala Tuhan Allah muyuh. Na muyuh manu Neneh.

²⁴ Muyuh megateh inan Tuhan rat aco ui nengiti nemuyuh.

²⁵ “Idi ui netekeradung sembayang inan Tuhan apat ngepulu' aco apat ngepulu' dacem kinioneh, ngaceku Tuhan pian ngaté nemuyuh.

²⁶ Kesembayangku, ‘Tuhan Allah, aleg ngaté pupuMu idi babpatMu, luk pangeh inuli' ngaceku rayehMu, luk pangeh inuitMu remuat rat bang bawang Masir ku laludMu sebuleng.

²⁷ Ngerawé demulunMu Ibrahim, Isak, idi Yakub. Aleg Iko nier tueh niat pupu ini, idi datdeh idi sala'deh,

²⁸ pad lun Masir na pebala, “Tuhan na miak nguit nedeh ineh semuet bang bawang luk pangeh pijani'Neh kuandeh. Idi ngaceku usehNeh nedeh, idi Ieh nenguit nedeh remuat pad Ieh miak ngaté nedeh déi' su luk ali-ali.”

²⁹ Ngaceku ideh pupuMu, idi babpatMu luk pangeh inuitMu remuat ngaceku tueh idi laludMu luk rayeh.’