BADA' RATNAN UKUM 8 - BALA LUK DO'

Tana' Luk Do' Luk Lapendeh Inan Tebawang

¹ “Do' muyuh lutep maya' amung luk pangeh bilaku nemuyuh aco sini. Pad muyuh miak mulun, idi muyuh uen ngula', pad muyuh miak tebawang bang bawang luk pijani' Tuhan kuan tepun muyuh.

² Idi do' muyuh ngerawé kuyut Tuhan Allah muyuh nemuyuh déi' su luk ali-ali, apat ngepulu' lak kinioneh, pad Ieh nengebeneh niat muyuh idi nenutun nemuyuh, pad Ieh kali' anun luk bang niat muyuh, kudeng muyuh maya' balaNeh kian na lek.

³ Idi Ieh nengebeneh niat muyuh, idi nenganau' nemuyuh melau. Idi Ieh nemaré manna kenen muyuh luk na inan muyuh nepekalai, idi luk na inan tepun muyuh nepekalai teh, pad muyuh kali', baken ratnan akan mo' lemulun miak mulun. Iamo' lemulun mulun ratnan amung bala luk remuat ratnan tang Tuhan.

⁴ Idi bang apat ngepulu' lak ayung muyuh na melu luun burur muyuh. Idi kukud muyuh pana' nateh mebara'.

⁵ Idi do' muyuh ngerawé, Tuhan pangeh nemada' nemuyuh mepad kudeng aceh taman mada' anakneh.

⁶ Idi do' muyuh nginita amung bala Tuhan Allah muyuh pad muyuh maya' dalanNeh idi matot Neneh.

⁷ Ngaceku muyuh pana' iten Tuhan Allah muyuh amé' inan tana' luk do', aceh tana' su luk inan arur, bued abpa', idi abpa' luk remuat rat bang tana' bang ruan, idi luun pegkung pana';

⁸ ieh ineh tana' luk inan padé, dalé, anggur, gita', idi bua' delima, umau saitun, idi duru'.

⁹ Su ineh muyuh na melau. Idi na muyuh masi' ku anun-anun. Inan belawan bang batu bawang ineh, idi rat pegkung-pegkungneh muyuh miak ngukat tekaling.

¹⁰ Muyuh miak kuman pad macing mebor, pelé muyuh ngubur Tuhan Allah muyuh ngaceku tana' luk do' luk pangeh biréNeh kuan muyuh.

Ratnan Na Mekelupan Tuhan Allah

¹¹ “Matar do'-do', pad muyuh na mekelupan Tuhan Allah muyuh, idi pad muyuh na ngelaba ukumNeh luk biréku nemuyuh aco sini.

¹² Kareb muyuh pangeh kuman pad macing mebor, idi pangeh nemudut idi tudo bang ruma' luk do',

¹³ idi sapi' idi dumba muyuh pana' pangeh mula', idi muyuh pangeh nengalap mula' amas, pirak, idi amung binaweh luk meraga,

¹⁴ aleg muyuh medita' niat, pad muyuh na mekelupan Tuhan Allah muyuh luk nenguit nemuyuh remuat rat bang bawang Masir, su luk inan muyuh tiban ineh.

¹⁵ Ieh nenguyut nemuyuh maya' su luk ali-ali, ieh ineh tana' luk rayeh idi luk inan matot. Inan menipeh luk megalih idi menipal kara'. Idi su ineh tekering ngaceku na abpa'. Ieh teh luk nengacing abpa' kuan muyuh rat bang batu luk metueh.

¹⁶ Idi déi' su luk ali-ali Ieh nemaré manna kuan muyuh luk na inan tepun muyuh nepekalai, pad Ieh miak ngebeneh niat muyuh idi nutun nemuyuh, pad Ieh miak ngeperuan nemuyuh muci.

¹⁷ Idi aleg muyuh ngerawé, ‘Idi dengan lalud idi tueh kai sebuleng kai pangeh nengalap amung binaweh ini.’

¹⁸ Iamo' do' muyuh megéi' ngerawé Tuhan Allah muyuh luk maré lalud nemuyuh, pad muyuh ngalap mula' binaweh, ngaceku Ieh pian ngacing luk pangeh pijani'Neh kuan tepun muyuh mepad kudeng luk pangeh mangun nekini.

¹⁹ Aleg muyuh mekelupan Tuhan Allah muyuh idi maya' allah baken, idi tekeradung sembayang nedeh, pad muyuh na maté kumin Tuhan maya' kudeng luk bilaku.

²⁰ Kudeng muyuh na maya' ukum Tuhan, idi muyuh pana' miak pitayen, mepad kudeng lun pupu baken miak pitayen Tuhan pa kiung muyuh.