BADA' RATNAN UKUM 7 - BALA LUK DO'

Pupu Tuhan Sebuleng

¹ “Tuhan Allah muyuh nguit nemuyuh amé' bang bawang luk ulek muyuh, idi kareb muyuh nalan Ieh miak ngusu pupu-pupu luk meluun rayeh idi melalud rat nemuyuh, ieh ineh amung lun Hiti, Girgasi, Amori, Kanaani, Prisi, Hiwi, idi Yebusi.

² Idi kareb Tuhan Allah muyuh pangeh nemaré nedeh bang palad muyuh, idi muyuh pangeh nengelaya' nedeh, do' muyuh ngaté amungdeh. Aleg muyuh pejani' nedeh. Idi aleg muyuh méi' nedeh.

³ Aleg muyuh ngaweh nedeh. Idi teh aleg nima' anak muyuh ngaweh nedeh.

⁴ Ngaceku ideh miak ngeraruh anak muyuh rat Negku, pad ideh maya' allah baken, idi pad Tuhan museh nemuyuh, idi ngaté nemuyuh denak-denak.

⁵ Iamo' do' muyuh nganau' kudeng ini nedeh. Mila' amung bubpundeh idi ngareg amung diri luk pangeh tipeddeh, idi temara' amung pulungdeh idi ngerupung amung akangdeh ku apui pad macing mabud.

⁶ Ngaceku muyuh ini aceh pupu luk meligan kuan Tuhan Allah muyuh idi luk pangeh pinili' Tuhan Allah muyuh ratnan amung pupu luk pa luun tana', pad muyuh mangun ku pupuNeh.

⁷ “Baken ngaceku muyuh meluun ula' ratnan amung lun luk baken, idi Tuhan méi' nemuyuh, pad Ieh nemili' nemuyuh. Ngaceku muyuh pawa' ratnan amung pupu ineh.

⁸ Iamo' Tuhan mawa nemuyuh pad Ieh ngacing jani'Neh kuan tepun muyuh. Idi Tuhan nenguit nemuyuh remuat ku laludNeh luk rayeh, idi nemuit nemuyuh ratnan bawang su luk inan muyuh tiban idi rat bang palad raca' Masir.

⁹ Ngaceku ineh do' muyuh kali' Tuhan Allah muyuh ineh Allah luk matu idi lutep maya' jani'Neh, idi mekatu kuan amung lemulun luk mawa Neneh idi luk nginita ukumNeh, ieh ineh macing nan tuda'-tuda' ngeribu anak inuldeh.

¹⁰ Iamo' Ieh petacu ngua' amung dat lemulun luk megateh Neneh, idi ngaté nedeh.

¹¹ Idi do' muyuh maya' amung bala luk bida' nemuyuh, idi maya' amung ukum luk biréku nemuyuh aco sini.

Lemulun Luk Maya' Bala Tuhan Uen Ngeperuan

¹² “Idi kudeng muyuh maya' amung bala ini idi nginita amung ukum ineh, idi Tuhan Allah muyuh pana' miak ngeletep kuan muyuh pejani'Neh idi katuNeh luk pangeh pijani'Neh kuan tepun muyuh.

¹³ Idi Ieh mawa nemuyuh, idi Ieh ngeperuan nemuyuh idi ngula' nemuyuh, pad muyuh mula' anak. Idi Ieh nengeperuan ulu' tana' muyuh, pad muyuh inan petap padé, abpa' anggur, idi umau saitun pana'. Anak sapi' idi anak dumba muyuh pana' uenNeh ngeperuan. Amung peruan ini miak barénNeh bang bawang luk pangeh pijani'Neh kuan tepun muyuh.

¹⁴ Idi muyuh uen ngeperuan meluun ratnan amung pupu baken. Idi rat arang muyuh seburur pana' nateh luk na anak. Idi sebuleng aya' pana' nateh luk na anak.

¹⁵ Idi Tuhan teh luk ngado amung ét rat nemuyuh. Idi amung kaca luk iko kali' déi' bawang Masir na miak macing nemuyuh peh. Iamo' ét ineh uenNeh ngacing kuan amung bunu' muyuh.

¹⁶ Idi muyuh miak ngabud amung pupu luk barén Tuhan Allah muyuh nemuyuh. Aleg muyuh méi' nedeh. Idi aleg muyuh sembayang nan allahdeh. Ngaceku ieh ineh mangun ku aceh abpung kuan muyuh.

¹⁷ “Aleg pebala bang niat muyuh, ‘Pupu ineh meluun ula' rat netau ini, kudeng apeh tau ngusu nedeh?’

¹⁸ Idi aleg muyuh matot nedeh. Do' megéi' ngerawé luk pangeh inau' Tuhan Allah muyuh kuan raca' Masir idi amung anak itinneh.

¹⁹ Do' ngerawé ratnan tutun luk rayeh luk pangeh sinier muyuh, idi amung tanu', kekamen luk nan mawa, lalud, idi tueh Tuhan Allah muyuh, kareb Ieh nemuit nemuyuh. Idi kudeng ineh teh luk miak ruen Tuhan Allah muyuh kuan amung pupu luk inan muyuh matot.

²⁰ Meluun teh Tuhan Allah muyuh miak maré aceh luk ngedereh arangdeh, pad amung lun luk ketecan idi luk nesigapung metutu' rat pa kiung muyuh.

²¹ Aleg muyuh megegker pa kiungdeh. Ngaceku Tuhan Allah muyuh idi dengan muyuh. Ieh Ineh Allah luk meluun rayeh idi luk inan matot.

²² Idi dengan ulai-ulai Ieh miak nala' amung pupu ini rat pa kiung muyuh. Idi na muyuh petacu ngelaya' nedeh, pad na pung luk mesangit meluun ula' rat nemuyuh.

²³ Iamo' Tuhan miak maré bunu' ineh bang palad muyuh, idi ngagap nedeh pad ideh mabud maté.

²⁴ Idi raca'-raca'deh ineh miak barén bang palad muyuh, idi muyuh pana' miak nala' ngadandeh rat pa liang langit. Seburur pana' nateh miak tuman pa kiung muyuh, pad muyuh ngaté amungdeh.

²⁵ Idi do' muyuh ngerupung amung akangdeh. Aleg muyuh melili ku amas idi pirak luk nedeh idi pian ngalap ineh kuan burur muyuh sebuleng, pad muyuh na mepabpung ku ineh. Ngaceku ieh ineh binaweh inan Tuhan Allah muyuh megateh.

²⁶ Idi aleg muyuh nguit binaweh luk ku gateh ineh amé' bang ruma' muyuh, pad kediman luk luun binaweh ineh na macing nemuyuh. Do' muyuh megateh neneh, ngaceku binaweh ineh pangeh kidiman Tuhan.