Biblia Todo Logo
Bìoball air-loidhne

- Sanasan -

BADA' RATNAN UKUM 6 - BALA LUK DO'


Ukum Luk Rayeh

1 “Idi ini amung ukum luk pangeh icuk Tuhan Allah muyuh negku badén nemuyuh, pad muyuh maya' ineh bang bawang luk inan muyuh tebawang,

2 pad muyuh matot inan Tuhan Allah muyuh, do' muyuh idi anak-anak muyuh, idi mupun muyuh, ruked ulun muyuh, pad ulun muyuh mekadang.

3 Idi ngaceku ineh ninger muyuh, O lun Israil, idi nginita do'-do' idi maya' amung ineh, pad muyuh do' udeng, idi muyuh amé' mula' bang bawang luk mebaleng ineh, mepad kudeng Tuhan Allah tepun muyuh pangeh nepejani' nemuyuh.

4 “Ninger muyuh, O lun Israil! Tuhan Ieh ineh Allah tau. Ieh ineh Tuhan tau luk sebuleng.

5 Idi do' muyuh mawa inan Tuhan Allah muyuh dengan amung niat muyuh, idi amung burur muyuh, idi amung tueh muyuh.

6 Idi do' nganug bang niat muyuh amung bala luk biréKu nemuyuh aco sini.

7 Idi mada' ini do'-do' kuan anak-anak muyuh, idi do' megéi' mada' amung-amung bala ineh kareb muyuh tudo bang ruma' muyuh, idi kareb muyuh nalan, idi kareb muyuh tudo, idi kareb muyuh ngakem.

8 Idi do' muyuh ngabet bala ineh nan penguan muyuh, mangun ku aceh terawé, idi do' ineh mangun ku etu luun madu' muyuh.

9 Idi do' ngayud ineh luun diri tanga' ruma' muyuh, idi luun amung tanga' muyuh.


Aleg Ngelaba Bala Tuhan

10 “Tuhan Allah tau nguit nemuyuh semuet bang bawang luk pijani'Neh kuan tepun muyuh Ibrahim, Isak, idi Yakub, ieh ineh bawang luk rayeh idi luk do' luk baken pinudut muyuh.

11 Idi amung ruma' bang bawang ineh panu' ku binaweh luk do' luk baken inau' muyuh, idi inan tuda'-tuda' subuk luk baken inukat muyuh, idi tuda'-tuda' kabun anggur idi kabun lawa saitun luk baken tinibu muyuh; idi kareb muyuh kuman pad mebor,

12 matar do'-do' pad muyuh na mekelupan Tuhan luk pangeh nenguit nemuyuh remuat rat bang bawang Masir, rat su luk inan muyuh mangun ku demulun ineh.

13 Do' muyuh matot inan Tuhan Allah muyuh, idi sembayang Neneh sebuleng mo', idi pebulung ku ngadanNeh teh.

14 Aleg muyuh maya' allah pupu baken luk tudo libut-libut muyuh,

15 pele' useh Tuhan na macing nemuyuh mepad kudeng apui idi ngaté nemuyuh. Ngaceku Tuhan Allah muyuh luk idi dengan muyuh kali' rungen temaruh peh.

16 “Aleg muyuh nutun Tuhan Allah muyuh mepad kudeng luk inau' muyuh déi' Masa.

17 Do' muyuh megéi' maya' amung ukum luk biréNeh nemuyuh.

18 Do' nganau' luk matu idi luk do' pa kiung Tuhan Allah muyuh, pad muyuh do' udeng, kareb muyuh semuet idi ngalap bawang luk do', luk pangeh pijani' Tuhan kuan tepun muyuh,

19 pelé amung bunu' muyuh uen muyuh ngusu, maya' kudeng luk bila Tuhan.

20 “Idi kali' rungen anak muyuh ngitun nemuyuh muci, kebaladeh, ‘Ngudehké Tuhan Allah tau nengecuk nemuyuh maya' amung ukum ini?’

21 Do' muyuh mada' kuan anak muyuh ineh, ‘Idi atun kai ini lun duken raca' Masir. Iamo' tau inuit Tuhan remuat rat bang bawang Masir ineh ku laludNeh luk rayeh.

22 Idi Tuhan pangeh nenganau' kekamen luk nan mawa idi tanu'-tanu' luk rayeh luk ngacing susa' kuan lun Masir idi kuan raca'deh idi kuan tetek ruma'neh pa kiung tau.

23 Iamo' tau inuitNeh remuat rat bang bawang Masir, pad Ieh miak nguit netau semuet bang bawang luk pangeh pijani'Neh kuan tepun tau.

24 Idi Tuhan Allah tau nengecuk netau maya' amung ukum ini, idi matot Neneh, pad tau megéi' do' udeng, idi pad Ieh ngulun netau mepad kudeng nekini.

25 Idi ini luk matu kuan tau, kudeng tau nginita do'-do' idi maya' amung ukum ini pa kiung Tuhan Allah tau, mepad kudeng luk pangeh bila Tuhan kuan tau.’

BALA LUK DO' Lun Bawang Bible © The Bible Society of Malaysia 1982, Second Edition 1998.

Bible Society of Malaysia
Lean sinn:



Sanasan