BADA' RATNAN UKUM 5 - BALA LUK DO'

Ukum Pulu'

¹ Idi Musa nengamung amung lun Israil, idi kebalaneh nedeh, “Ninger muyuh, O lun Israil, amung bada' ratnan ukum luk belénku nemuyuh aco sini. Idi do' muyuh nginita amung ineh idi maya' ineh.

² Tuhan Allah tau pangeh nenganau' aceh pejani' kuan tau déi' Pegkung Sinai.

³ Baken kuan tepun tau mo' Tuhan nenganau' pejani' ineh, iamo' kuan tau luk mulun nekini pana'

⁴ Idi Tuhan nepebala petutup pa kiung muyuh déi' luun pegkung idi rat bang apui ineh.

⁵ Idi kareb ineh ui tuped arang Tuhan dengan muyuh, idi nemada' nemuyuh ku bala Tuhan, ngaceku muyuh matot ku apui ineh. Idi muyuh na sikal uké pegkung. “Idi kebalaNeh,

⁶ ‘Ui ini Tuhan Allahmu luk pangeh nenguyut namu remuat rat bang bawang Masir, rat su luk inanmu tiban ineh.

⁷ “ ‘Aleg iko maya' allah baken rat Negku.

⁸ “ ‘Aleg iko nganau' akang maya' ayu anun-anun luk déi' langit, idi luk bang tana', idi luk bang abpa' pana'.

⁹ Aleg iko ngubur idi tekeradung sembayang ku ineh. Ngaceku Ui ini Tuhan Allahmu luk temaruh, luk ngua' sala' amung taman macing ku anak, idi inul luk keteluh idi luk keapat ratnan amung lemulun luk megateh Negku.

¹⁰ Iamo' Ui ngegala' katuKu kuan ribu-ribu inul luk mawa Negku idi luk ngimet balaKu.

¹¹ “ ‘Aleg iko neten ngadan Tuhan Allahmu mo'-mo'. Ngaceku Ui miak ngukum idé'-idé' luk neten ngadanKu mo'-mo'.

¹² “ ‘Do' iko nginita Aco luk inan Mudeng, pad iko ngeligan ineh, maya' kudeng bala Tuhan Allah namu.

¹³ Anem aco kinioneh iko miak ngakem.

¹⁴ Iamo' aco luk ketudu' ineh, ieh ineh aco luk inan Tuhan Allahmu nudeng. Kareb aco ineh aleg iko ngakem, do' iko idi anakmu deléi idi decur pana'; idi lun tebarinmu deléi idi decur teh, aya'mu, idi lun sakai luk tudo bang bawangmu, pad lun dukenmu luk deléi idi decur miak ucu' ngato erurdeh mepad kudeng iko teh.

¹⁵ Do' iko ngerawé iko pana' lun tebarin déi' bawang Masir. Idi Tuhan Allahmu pangeh nenguit namu remuat dengan lalud idi tuehNeh luk rayeh. Ngaceku ineh Tuhan Allahmu nengecuk namu nginita Aco luk inan Mudeng.

¹⁶ “ ‘Do' ngedita' tamanmu idi tinanmu, maya' kudeng luk icuk Tuhan Allahmu namu' pad ulunmu mekadang, idi iko do' udeng bang bawang luk biré Tuhan Allahmu namu.

¹⁷ “ ‘Aleg iko ngaté lemulun.

¹⁸ “ ‘Aleg iko pasét.

¹⁹ “ ‘Aleg iko mano.

²⁰ “ ‘Aleg iko ngadu' nelun denganmu dengan mebalih.

²¹ “ ‘ Aleg iko melili ku awan lun denganmu. Aleg iko melili ku ruma'neh, tana'neh, lun tebarinneh, sapi'neh, keladaineh, idi binawehneh luk baken.’

²² “Idi amung bala ini bida' Tuhan kuan muyuh dengan arod luk rayeh déi' luun pegkung rat bang apui idi rat bang laput luk medacem. Idi Ieh nengayud bala ineh luun dueh balad batu, idi Ieh nemaré ineh negku.

Tot Lun Israil

²³ “Idi kareb muyuh neninger uni tang ineh ratnan dacem, idi pegkung ineh pana' mebudung ku apui, idi muyuh iné' negku, ieh ineh amung lun rayeh pupu muyuh idi teh amung lun rayeh lun mula'.

²⁴ Kebaladeh, ‘Tuhan Allah tau pangeh nengegala' kuan kai ubur idi rayehNeh, idi kai pangeh neninger arodNeh rat bang apui. Idi aco sini pana' kai pangeh nekali' Allah nepebala kuan lemulun, idi ieh mulun teh.

²⁵ Iamo' mekudeh kai maté ku apui luk rayeh ineh? Kudeng kai mio ninger arod Tuhan Allah tau, kali' rungen kai maté.

²⁶ Idéké rat arang amung lemulun pangeh neninger arod Allah luk mulun ineh, luk nepebala rat bang apui, mepad kudeng luk pindenger kai ini, idi ieh muluh teh?

²⁷ O Musa, do' iko amé' matun Neneh idi ninger amung bala luk badén Tuhan Allah tau. Idi do' iko mada' kuan kai amung bala luk badén Tuhan Allah tau namu. Idi kai pian ninger idi maya' ineh.’

²⁸ “Kareb Tuhan neninger bala ineh, idi kebalaNeh negku, ‘Ui pangeh neninger bala pupu ini, idi amung baladeh matu.

²⁹ Idi meluun do' ideh megéi' matot Negku idi nginita amung balaKu, pad ideh idi anak-anakdeh do' udeng macing ruked-ruked!

³⁰ Do' iko amé' ngecuk nedeh muli' amé' lepodeh.

³¹ Iamo' do' Musa tuped su ini denganKu pad Ui mada' namu amung ukum idi bala luk miak badénmu nedeh, pad ideh maya' ineh bang bawang luk barénKu nedeh.’

³² “Idi matar do'-do', pad muyuh maya' amung-amung luk icuk Tuhan Allah nemuyuh. Idi aleg ngebala balaNeh.

³³ Idi do' muyuh maya' amung dalan luk tinicul Tuhan Allah nemuyuh, pad ulun muyuh mekadang idi muyuh do' udeng bang bawang luk inan muyuh tebawang.