BADA' RATNAN UKUM 4 - BALA LUK DO'

Musa Ngecuk Nelun Israil Nginita Ukum Tuhan

¹ Kebala Musa nelun mula', “O lun Israil, do' muyuh maya' amung ukum luk bida'ku nemuyuh, pad muyuh miak mulun idi tebawang bang bawang luk biré Tuhan Allah tepun muyuh nemuyuh.

² Idi aleg muyuh ngeluun aceh bila' balaku ini. Idi aleg muyuh ngurang ineh. Iamo' nginita amung ukum Tuhan Allah muyuh luk bida'ku nemuyuh.

³ Idi muyuh pangeh nenier amung luk pangeh inau' Tuhan déi' Pegkung Pior. Ieh nengaté nelun rat arang muyuh luk nemaya' Baal su ineh.

⁴ Iamo' amung muyuh luk lutep inan Tuhan Allah muyuh, mulun macing nekini.

⁵ “Idi ui pangeh nemada' nemuyuh amung ukum maya' kudeng luk icuk Tuhan Allahku negku, pad muyuh miak nganau' luk matu, kareb muyuh semuet bang bawang luk inan muyuh miak tebawang.

⁶ Idi do' muyuh lutep maya' ukum ineh, ngaceku ieh ineh mangun ku ileh muyuh, pa kiung amung pupu. Kareb ideh ninger amung ukum ini, idi ideh miak pebala, ‘Pupu luk rayeh ini, ieh ineh aceh pupu luk mileh idi luk do' kali.’

⁷ “Na luk idi pupu baken, sagan tu pana' rayeh, luk inan allah luk muneng nedeh, mepad kudeng Tuhan Allah tau luk ngua' putuh tau, kareb mutuh pedengan.

⁸ Na luk idi pupu baken, sagan tu pana' rayeh, luk inan ukum luk mesiri mepad kudeng amung ukum luk biréku nemuyuh bang aco sini.

⁹ Matar do'-do', idi aleg kelupan amung-amung luk pangeh sinier muyuh, pad amung ineh na mekelupan ruked ulun muyuh. Idi do' muyuh maré kali' kuan anak-anak muyuh idi kuan mupun-mupun muyuh,

¹⁰ ratnan aco muyuh iné' pa kiung Tuhan Allah muyuh déi' Sinai, kareb Tuhan nepebala negku kudeng ini, ‘Ngamung lun mula' ineh kuanKu pad Ui maré nedeh ninger amung balaKu, idi ideh miak matot Negku seruked ideh mulun luun tana', idi ideh miak mada' anak-anakdeh teh.’

¹¹ “Do' mada' nedeh ratnan kudeng apeh muyuh iné' muneng idi tuped iang pegkung, idi pegkung ineh pana' mebudung ku apui macing déi' langit, idi inan rabpun luk mitem idi dacem luk mepingot.

¹² Idi Tuhan nepebala nemuyuh rat bang apui ineh. Idi uni bala ineh pangeh pindenger muyuh. Iamo' na muyuh nenier aceh ayu anun-anun, iamo' neninger uni tang mo' sebuleng.

¹³ Idi Ieh nemaré kali' nemuyuh pejani'Neh luk dukenNeh uen muyuh maya', ieh ineh pulu' ukum luk pangeh inayudNeh luun dueh balad batu.

¹⁴ Idi Tuhan nengecuk negku mada' nemuyuh amung ukum luk miak bén muyuh bang bawang luk ulek muyuh inan muyuh tebawang.

Aleg Sembayang Inan Akang

¹⁵ “Do' muyuh matar do'-do', ngaceku aceh ayu pana' nateh luk sinier muyuh kareb Tuhan nepebala nemuyuh déi' Sinai rat uned apui ineh.

¹⁶ Idi aleg muyuh nganau' luk dat. Idi aleg nganau' akang luk inarit mepad kudeng ayu deléi idi decur,

¹⁷ pung idi suit,

¹⁸ pung luk suloi luun tana', idi lawid.

¹⁹ Idi aleg muyuh meraruh pad muyuh tekeradung sembayang nan luk siren muyuh i langit — aco, bulan, idi gituen. Amung ineh pangeh biré Tuhan Allah muyuh kuan amung pupu luk liang langit ku babpatdeh.

²⁰ Iamo' Tuhan pangeh nengiding nemuyuh idi nenguit nemuyuh remuat rat bang tetel belawan, ieh ineh bawang Masir, pad muyuh mangun ku pupu Tuhan, mepad kudeng luk pangeh nangun nekini.

²¹ Idi Tuhan museh negku ngaceku muyuh. Idi Ieh nepebulung pad ui na miak guta Abpa' Yarden. Idi na ui miak semuet bang bawang luk do' luk pangeh biré Tuhan kuan muyuh ku babpat muyuh sebuleng.

²² Ui maté bang bawang ini. Idi na ui guta Abpa' Yarden. Iamo' muyuh guta ineh idi tebawang su ineh luun tana' luk mebaleng.

²³ Matar do'-do', pad muyuh na kelupan jani' Tuhan Allah muyuh, pelé muyuh na nganau' akang luk inarit mepad kudeng ayu anun-anun pana'.

²⁴ Ngaceku Tuhan Allah muyuh ineh aceh apui luk mebudung, ieh ineh aceh Allah luk temaruh.

²⁵ “Idi kareb muyuh inan anak idi ngimupun, idi muyuh pangeh mio bang bawang ineh, idi aleg muyuh mesala' pad muyuh nganau' aceh akang luk inarit mepad kudeng ayu anun-anun pana'. Lawé luk kudeng ineh pelaba dat pa kiung Tuhan Allah muyuh, idi ngacing usehNeh.

²⁶ Kudeng muyuh nganau' kudeng ineh, idi aco sini teh ui nawar langit idi tana' maré kali' rat nemuyuh, idi denga segageh muyuh miak metutu' rat bang bawang ineh. Idi na muyuh mio tebawang bang bawang luk i dipar Abpa' Yarden luk ulek muyuh. Iamo' muyuh mabud maté.

²⁷ Idi Tuhan miak ngatad nemuyuh amé' arang pupu baken, pad inan sesuut mo' rat arang muyuh luk ketecan déi'.

²⁸ Idi muyuh miak sembayang inan allah-allah luk pinudut ticu' lemulun, ieh ineh akang luk inau' ratnan kayuh idi batu luk na nier, na ninger, na kuman, idi na muen pana'.

²⁹ Idi bang bawang ineh muyuh miak nakap Tuhan Allah muyuh. Idi muyuh miak kali' Neneh, kudeng muyuh nakap Neneh dengan amung niat muyuh idi amung burur muyuh.

³⁰ Kareb muyuh bang susa' idi amung ini mangun kuan muyuh muci aco, idi muyuh miak lemubed amé' inan Tuhan Allah muyuh idi maya' balaNeh.

³¹ Idi Tuhan Allah muyuh ineh Allah luk méi'. Na Ieh miak necan nemuyuh, idi na Ieh ngedat nemuyuh, idi na Ieh kelupan pejani'Neh luk pangeh pijani'Neh kuan tepun muyuh.

³² “Idi do' ngitun ratnan kareb luk atun rat nemuyuh, ieh ineh rat kareb Allah nemudut lemulun luun tana', idi do' nakap rat iring langit amé' iring langit luk selipa, kudeng inan aceh kekamen luk kudeng ini rayeh, luk pangeh sinier idi pindenger.

³³ Inanké aceh pupu baken luk pangeh neninger tang aceh allah luk pebala rat neninger tang aceh allah luk pebala rat bang apui, mepad kudeng luk pindenger muyuh, idi luk mulun teh?

³⁴ Inanké allah baken luk mekuu' ngiding kuan bururneh sebuleng aceh pupu rat arang pupu baken, mepad kudeng luk pangeh inau' Tuhan Allah muyuh kareb muyuh déi' Masir? Pa kiung muyuh Ieh nengegala' lalud idi tuehNeh, pad Ieh nengacing kaca idi bunu'. Ieh nenganau' tanu' idi kekamen luk nan mawa. Idi teh Ieh nengacing luk nan matot.

³⁵ Idi ieh ineh tinicul kuan muyuh, pad muyuh kali' Tuhan sebuleng ineh Allah, idi na luk baken rat Neneh.

³⁶ Idi Ieh nenima' nemuyuh ninger arodNeh rat bang langit, pad Ieh mada' nemuyuh. Idi Ieh pangeh nemaré nemuyuh nier apuiNeh luk rayeh ineh pa luun tana'. Idi muyuh neninger balaNeh rat bang apui ineh.

³⁷ Idi ngaceku Ieh méi' kuan tepun muyuh idi nemili' inuldeh, idi Ieh sebuleng nenguit nemuyuh remuat rat bang bawang Masir dengan laludNeh luk rayeh.

³⁸ Idi Ieh nengusu tuda'-tuda' pupu luk meluun rayeh idi meluun tueh rat nemuyuh pa kiung muyuh, pad Ieh miak maré bawangdeh ineh ku babpat muyuh, mepad kudeng luk pangeh mangun nekini.

³⁹ Idi nekini do' muyuh ngerawé, idi Tuhan ineh Allah pa luun langit idi pa luun tana'. Idi na luk baken ratnan Allah.

⁴⁰ Do' muyuh nginita amung ukumNeh luk bida'ku nemuyuh nekini, pad muyuh idi anak-anak muyuh do' udeng, idi pad ulun muyuh mekadang bang bawang luk biré Tuhan Allah kuan muyuh ruked-ruked.”

Bawang Luk Inan Lun Ngaté Sigapung Pa Busat Aco Abpa' Yarden

⁴¹ Idi Musa nengatad teluh bawang luk déi' dipar Abpa' Yarden luk pa busat aco.

⁴² Idi lun luk ngaté lemulun dengan na inau' rungen miak buro amé' bang sebuleng bawang ineh, kudeng na ieh megateh nan lemulun ineh rat mon, pad ieh miak mulun.

⁴³ Bawang luk litep ineh: Bisar déi' su luk ali-ali déi' tana' raked kuan lun Rubin, Ramot déi' bawang Giliad kuan lun Gad, idi Golan déi' bawang Basan kuan lun Manasé.

Musa Ngimun Ngelio Ukum Tuhan

⁴⁴ Idi ini ukum Allah luk biré Musa kuan lun Israil.

⁴⁵ Idi ini bada' ratnan ukum luk biré Musa kuan lun Israil kareb ideh neremuat rat bang bawang Masir,

⁴⁶ ieh ineh dipar Abpa' Yarden déi' ruan luk petutup ku Bait Pior déi' tana' Sihon, raca' lun Amori, luk tudo déi' Hesbon, idi luk linaya' Musa idi lun Israil kareb ideh neremuat rat bawang Masir.

⁴⁷ Idi ideh netebawang luun tana' Sihon ineh idi luun tana' Og, raca' Basan. (Ieh ineh didueh raca' lun Amori luk dipar Abpa' Yarden, luk pa busat aco.)

⁴⁸ Tana' luk ilapdeh ineh rat bawang Arur luk tangeb Abpa' Arnon macing Pegkung Sirion, ieh ineh Pegkung Hermon.

⁴⁹ Idi amung tana' luk pa busat aco Abpa' Yarden, macing Abpa' Luk Mepaci' luk luun surud iang Pegkung Pisga.