BADA' RATNAN UKUM 3 - BALA LUK DO'

Lun Israil Nengelaya' Raca' Og

¹ “Pangeh ineh tau numai maya' dalan amé' déi' Basan. Idi Og, raca' Basan iné' pebnu' netau perapu dengan amung anak itinneh déi' Edri.

² Iamo' kebala Tuhan negku, ‘Aleg iko matot neneh, ngaceku Ui pangeh nemaré neneh bang paladmu perapu amung anak itinneh, idi amung bawangneh teh. Idi do' iko ngaté neneh mepad kudeng iko nengaté ni Sihon, raca' lun Amori, luk tudo déi' Hesbon.’

³ “Idi Tuhan Allah tau nemaré Og, raca' Basan, idi amung anak itinneh pana' bang palad tau. Idi tau nepebunu' nedeh, pad seburur pana' nateh luk neketecan.

⁴ Idi tau nengalap amung bawangneh. Sebuleng bawang pana' nateh luk na ilap rat nedeh, ieh ineh anem ngepulu' bawang maput babpat Argob, ieh ineh imet Og déi' Basan.

⁵ Idi amung bawang rayeh ineh inau'deh meraben dengan libung batu luk medita'; idi tanga' ar inan palin, idi inan teh mula' bawang luk isuut luk na linibung.

⁶ Tau nengusag amung bawang ineh, mepad kudeng tau pangeh nengusag bawang Sihon, raca' Hesbon; idi tau nengaté amung lun deléi idi decur idi amung anakdeh.

⁷ Iamo' amung aya' idi amung binaweh bang bawangdeh pangeh ilap tau kuan burur tau sebuleng.

⁸ “Idi kudeng ineh luk inau' tau kareb tau nengalap tana' luk i dipar Abpa' Yarden ineh rat bang palad dueh raca' Amori, ieh ineh rat Arur Arnon macing Pegkung Hermon,

⁹ (idi lun Sidoni neten Pegkung Hermon ineh Sirion. Idi lun Amori neten ineh Senir.)

¹⁰ Idi amung bawang tana' raked, idi aput bawang Giliad, idi maput bawang Basan macing déi' Salka idi Edri, ieh ineh amung bawang bang imet Og déi' Basan.” (

¹¹ Idi Raca' Og mo' luk neketecan ratnan amung lun Repaim. Pagauneh luk inau' ratnan belawan idi déi' bawang Raba pupu Amon. Kikadangneh dueh depeh mela, idi pipangneh medepeh.)

Pupu Luk Tudo Pa Busat Aco Abpa' Yarden

¹² “Kareb tau nengalap tana' ineh, rat arur luk i tangeb Abpa' Arnon idi sebuang pegkung bawang Giliad perapu ku amung bawangdeh pangeh biréku kuan lun Rubin idi kuan lun Gad.

¹³ Idi tana' Giliad luk ketecan idi aput bawang Basan luk bang imet Og ineh, ieh ineh maput babpat Argob, biréku kuan setangal inul Manasé.” (Idi aput bawang Basan ineh, ieh ineh titen tana' lun Repaim.

¹⁴ Idi Yair anak Manasé ineh nengalap aput babpat Argob, macing lakan bawang lun Gesori idi lun Makati. Idi bawang ineh, ieh ineh Basan, titenneh Bawang Lepo Yair, maya' ngadanneh sebuleng macing aco sini.)

¹⁵ “Idi ui nemaré Giliad kuan inul Makir.

¹⁶ Idi kuan lun Rubin idi lun Gad pangeh biréku aceh babpat Giliad macing Abpa' Arnon. Idi uned abpa' mangun ku lakandeh pa kabing busat aco, idi lakandeh pa tinueh busat aco, ieh ineh Abpa' Yabuk luk mangun ku sekamu' lakan bawang pupu Amon.

¹⁷ Idi teh pa acep aco Abpa' Yarden mangun ku lakandeh, rat Takung Galilia pa tinueh busat aco macing i tangeb Abpa' Luk Mepaci' pa kabing busat aco, idi macing iang Pegkung Pisga pa busat aco.

¹⁸ “Idi kareb ineh teh kebalaku nedeh kudeng ini, ‘Tuhan Allah tau pangeh nemaré tana' ini luk pa busat aco Abpa' Yarden mangun ku babpat muyuh. Ngaceku ineh do' amung lun luk mesangit rat arang muyuh guta pa atun amung kinanak muyuh lun Israil.

¹⁹ Iamo' awan idi anak muyuh idi amung aya' muyuh — idi ui kali' mula' aya' muyuh — amung ineh miak tacin bang bawang luk pangeh biréku nemuyuh,

²⁰ pad Tuhan maré amung kinanak muyuh do' udeng mepad kudeng muyuh teh, idi ideh miak tudo bang bawang luk biré Tuhan Allah muyuh kuandeh i dipar Abpa' Yarden. Pangeh ineh do' amung muyuh muli' amé' inan babpat luk biréku nemuyuh.’

²¹ “Idi kareb ineh kebalaku ni Yusak, ‘Muyuh pangeh nenier amung luk inau' Tuhan Allah muyuh kuan dueh burur raca' ini. Idi kudeng ineh teh luk miak ruen Tuhan kuan amung bawang, su luk ulek muyuh.

²² Aleg muyuh matot nedeh, ngaceku Tuhan Allah muyuh luk pebunu' ku libal muyuh.’

Musa Bibpeng Tuhan Na Miak Semuet Bang Bawang Kanaan

²³ “Idi bang kareb ineh ui nesembayang, kesembayangku,

²⁴ ‘O Tuhan Allah, Iko nengimun nicul kuanku kekamenMu luk rayeh idi luk melalud. Na luk idi allah baken bang langit idi bang tana' ini luk miak nganau' mepad kudeng luk inau'Mu.

²⁵ Nima' negku guta, pad ui miak nier tana' mebaleng luk i dipar Abpa' Yarden, ieh ineh pegkung luk do' ineh idi Pegkung Lebanon pana'.’

²⁶ “Iamo' Tuhan museh negku ngaceku muyuh. Idi na Ieh nengua' putuhku. Iamo' kebala Tuhan negku, ‘Petap! Aleg iko mutuh baruh.

²⁷ Uké iko amé' luun Pegkung Pisga, idi nier pa acep aco idi pa tinueh busat aco, idi pa kabing busat aco, idi pa busat aco. Nier do'-do'! Iamo' na iko miak guta Abpa' Yarden ini.

²⁸ Do' maré kekamenmu kuan i Yusak, idi ngeletep idi ngeraben neneh. Ngaceku ieh luk miak guta pa atun pupu ini. Idi ieh teh miak nguyut nedeh ngalap tana' luk siniermu ineh.’

²⁹ “Idi ngaceku ineh tau tudo teh bang ruan luk petutup Bait Pior.”