BADA' RATNAN UKUM 2 - BALA LUK DO'

Tuda'-Tuda' Lak Déi' Su Luk Ali-Ali

¹ “Idi tau nelemubed iné' su luk ali-ali maya' dalan amé' Abpa' Pisui, maya' kudeng luk icuk Tuhan negku. Idi tau nenalan nengelibut pegkung-pegkung Edom tuda'-tuda' lak kinioneh.

² “Idi kebala Tuhan negku,

³ ‘Pangeh petap lawé muyuh nengelibut pegkung ini. Do' muyuh lemubed amé' pa tinueh busat aco.

⁴ Do' mada' kuan pupu ini: Idi na mio teh muyuh lemaba lakan bawang kinanak muyuh, ieh ineh inul Esau, luk tudo déi' Edom. Ideh matot nemuyuh, iamo' nginita burur muyuh do'-do' rat nedeh ineh.

⁵ Aleg muyuh nganau' luk inandeh pebunu'. Ngaceku ratnan tana'deh ineh na Ui maré nemuyuh kirayeh lengayan kukud muyuh pana', ngaceku pegkung-pegkung Edom* ineh pangeh biré kuan inul Esau.

⁶ Idi do' muyuh melih akan idi abpa' pana' rat nedeh.’

⁷ “Tuhan Allah muyuh pangeh nengeperuan nemuyuh bang amung-amung luk ruen muyuh. Idi Ieh pangeh nengasa' nemuyuh ruked dalan muyuh déi' su luk ali-ali, luk pelaba rayeh ineh. Idi apat ngepulu' lak ini Tuhan Allah muyuh idi dengan muyuh. Idi muyuh megéi' inan petap.

⁸ “Idi tau nenalan idi nenecan bawang kinanak tau, ieh ineh pupu Esau luk tudo déi' Edom. Tau nenecan Raked Yarden idi dalan rat Elat idi Esion Geber. Idi tau numai iné' su luk ali-ali déi' Moab.

⁹ “Idi kebala Tuhan negku, ‘Aleg muyuh nganau' luk inan lun Moab pebunu'. Ngaceku ratnan tana'deh sesuut pana' nateh barénKu nemuyuh, ngaceku bawang Ar pangeh biréKu kuan pupu Lut.’ ” (

¹⁰ Idi atun lun Emim tudo déi' Ar, ieh ineh aceh pupu luk rayeh, idi ideh medita' mepad kudeng pupu Enak ineh.

¹¹ Idi ideh titen lun Repaim mepad kudeng lun Enak ineh, iamo' lun Moab neten nedeh pupu Emim.

¹² Idi lun Hori tudo déi' Edom atun, iamo' pupu Esau nengusu nedeh rat bang bawang ineh idi nengaté nedeh. Idi pupu Esau tudo ieneh, mepad kudeng luk inau' lun Israil muci nan tana' luk pangeh biré Tuhan kuandeh ineh.)

¹³ “Idi tau amung neguta Arur Sered ineh, maya' kudeng luk icuk Tuhan netau.

¹⁴ Idi kinioneh tau nalan rat Kadis macing tau guta Arur Sered ineh, ieh ineh teluh ngepulu' ualuh lak, pad amung lun pebunu' mabud maté, maya' kudeng luk bila Tuhan kuandeh.

¹⁵ Idi Tuhan nemunu' nedeh, idi nengaté amung-amungdeh.

¹⁶ “Idi kareb amung lun pebunu' ineh nabud naté,

¹⁷ idi kebala Tuhan negku,

¹⁸ ‘Aco sini do' muyuh nalan lemaba lakan Moab déi' bawang Ar.

¹⁹ Idi kareb muyuh macing bawang lun Amon luk inul Lut, aleg muyuh nganau' luk inandeh pebunu'. Ngaceku ratnan tana' pupu Amon sesuut pana' nateh Ui maré ku babpat muyuh. Ngaceku bawang ineh pangeh biréKu nedeh.’

²⁰ (Idi bawang ini titen tana' lun repaim. Ngaceku atun lun Repaim tudo ieneh. Iamo' lun Amon neten nedeh pupu Samsumim,

²¹ ieh ineh aceh pupu luk rayeh, idi medita' mepad kudeng pupu Enak teh. Iamo' Tuhan nengaté nedeh pa kiung lun Amon luk nengalap tana'deh idi tudo déi' pesua nedeh,

²² mepad kudeng luk inau' Tuhan kuan pupu Esau luk tudo déi' luun pegkung-pegkung Edom, kareb Ieh nengaté lun Hori pa kiungdeh, pad pupu Esau nengalap tana' ineh ku babpatdeh. Idi ideh tudo ieneh pesua nedeh pad macing nekini.

²³ Idi lun Awi luk tudo bang bawang isuut macing déi' Gasa ineh, pangeh pinaté lun Kriti luk rat pulau Kriti. Idi ideh netudo déi' pesua nedeh.)

²⁴ “Idi kebala Tuhan, ‘Do' muyuh nalan idi guta Arur Arnon. Ui pangeh nemaré Sihon, raca' Hesbon, lun Amori ineh dengan bawangneh bang palad muyuh. Do' muyuh pebunu' nedeh, idi ngalap bawangdeh.

²⁵ Aco sini teh Ui ngimun ngacing tot nemuyuh kuan amung pupu iapeh-iapeh pana'. Kareb ideh ninger bala rat nemuyuh, ideh megegeker idi matot.’

Israil Ngelaya' Raca' Sihon

²⁶ “Idi Ui nengecuk tuda'-tuda' lun duken rat su luk ali-ali déi' Kedimot amé' matun Sihon, raca' Hesbon, pad ngacing bala pedo', kebaladeh,

²⁷ ‘Maré nekai lemaba bawangmu. Kai sikal maya' dalan rayeh. Na kai umai ratnan dalan.

²⁸ Idi do' iko masui akan ineh kuan kai, pad kai kuman, idi abpa' pana' pisuen kuan kai, pad kai ngirup. Iamo' nima' nekai nalan lemaba bawangmu,

²⁹ mepad kudeng luk pangeh inau' pupu Esau luk tudo déi' Edom* kuan kai, idi lun Moab pana' luk tudo déi' bawang Ar, pad kai guta Abpa' Yarden idi semuet bang bawang luk pangeh biré Tuhan Allah kai kuan kai.’

³⁰ “Iamo' Raca' Sihon na nemaré netau lemaba bawangneh. Ngaceku Tuhan Allah muyuh nengetueh niatneh, pad Ieh nemaré neneh bang palad muyuh mepad kudengluk pangeh mangun nekini.

³¹ “Idi kebala Tuhan negku, ‘Ui pangeh nengimun maré ni Sihon perapu bawangneh kuan muyuh. Do' muyuh ngimun ngalap bawangneh, mangun ku babpat muyuh.’

³² Idi Sihon dengan amung bawehneh iné' pebunu'netau déi' Yahas.

³³ Idi Tuhan Allah tau nemaré neneh bang palad tau. Idi tau nengaté ni Sihon, idi anak-anakneh idi amung anak itinneh.

³⁴ Kareb ineh tau nengalap amung bawangneh. Idi tau nengusag amung bawangdeh idi nengaté amung lun deléi idi decur, idi amung anakdeh. Seburur pana' nateh neketecan.

³⁵ Idi amung aya'deh ilap tau kuan burur tau sebuleng, idi amung binaweh bang bawangdeh luk pangeh linaya' tau.

³⁶ Rat Arur luk i tangeb Arur Arnon, idi rat bawang luk i tangeb arur ineh suet déi' Giliad, sebuleng bawang pana' nateh luk na linaya' tau, ngaceku Tuhan Allah tau nemaré amung ineh kuan tau.

³⁷ Iamo' na tau iné' muneng ku bawang lun Amon, idi amung tangeb Arur Yabuk idi amung bawang luk luun pegkung, idi iapeh-iapeh luk bibpeng Tuhan Allah tau.