BADA' RATNAN UKUM 16 - BALA LUK DO'

Irau Paska

¹ “Idi do' muyuh nganau' Irau Paska kuan Tuhan Allah muyuh bang bulan Abib. Ngaceku bang bulan Abib ineh Tuhan Allah muyuh nenguit nemuyuh remuat rat bang bawang Masir kareb medacem.

² Idi kareb Aco Rayeh Paska ineh do' iko ngeret sapi' idi dumba kuan Tuhan Allahmu su luk pilin Tuhan inan sembayang.

³ Idi aleg iko kuman ruti luk linamud dengan ineh. Tudu' aco kinioneh, do' iko kuman ruti luk na linamud, ngaceku dengan tepapeh-tepapeh iko pangeh neremuat rat bang bawang Masir. Kuman ruti ineh pad iko ngerawé derehmu ineh, pelé iko na mekelupan acomu neremuat rat bawang Masir ineh ruked ulunmu.

⁴ Seburur pana' bang bawang muyuh nateh luk inan lamud bang ruma'neh tudu' aco kinioneh; idi uang pung luk kereten muyuh malem luk pun-pun na miak ketecan macing kenebpa.

⁵ “Idi aleg ngeret pung luk ku baré Paska ineh iapeh-iapeh bang bawang muyuh luk barén Tuhan Allah muyuh kuan muyuh.

⁶ Iamo' ngeret ineh bang su luk pilin Tuhan inan sembayang, kareb macep aco, bang jam luk petulu dengan kareb muyuh neremuat rat bang bawang Masir.

⁷ Do' iko nanek idi kuman ineh su luk pilin Tuhan inan sembayang, idi pekak kenebpa miak iko muli'.

⁸ Idi anem aco kinioneh do' iko kuman ruti luk na linamud. Idi aco luk ketudu' ineh, ieh ineh aco rayeh kuan Tuhan Allahmu. Bang aco ineh na iko miak ngakem.

Irau Pangeh Ranih

⁹ “Idi do' iko ngiap tudu' minggu, ieh ineh rat pun-pun iko ngeranih.

¹⁰ Idi do' iko nganau' aco rayeh minggu ineh kuan Tuhan Allahmu, idi do' nguit baré dengan katu niat maya' peruan luk uen Tuhan Allahmu ngacing namu.

¹¹ Idi do' iko geriguen pa kiung Tuhan Allahmu dengan anakmu, lun dukenmu, idi lun Liwi, lun sakai, anak maté, idi decur tinula' luk tudo bang bawang muyuh, ieh ineh su luk pilin Tuhan inan sembayang.

¹² Do' muyuh ngerawé, muyuh pana' lun tebarin atun bang bawang Masir. Idi do' muyuh nginita idi maya' amung ukum ini.

Aco Rayeh Lepo

¹³ “Kareb iko pangeh nengamung amung uli' su luk inanmu rumik padé idi su luk inan ngeradu' anggur, do' iko nganau' Aco Rayeh Lepo tudu' aco kinioneh.

¹⁴ Idi bang aco sineh iko geriguen dengan anakmu, lun tebarinmu, idi lun Liwi, lun sakai, anak maté, idi decur tinula' luk tudo bang bawang muyuh.

¹⁵ Idi tudu' aco kinioneh do' iko nganau' aco rayeh kuan Tuhan Allahmu su luk pilin Tuhan inan sembayang, ngaceku Tuhan Allahmu ngeperuan amung uli' tana'mu, idi amung-amung luk ruenmu, pad iko mawang niat.

¹⁶ “Do' amung lun deléi rat arang muyuh amé' pa kiung Tuhan Allahmu su luk pilin Tuhan inan sembayang, teluh kua' bang selak, ieh ineh kareb Irau Paska, Irau Pangeh Ranih, idi Aco Rayeh Lepo. Aleg seburur lemulun amé pa kiung Tuhan dengan na luk barén.

¹⁷ Do' maré anid-anid maya' kudeng peruan luk barén Tuhan Allah nemuyuh.

Lun Luk Mutut Besara'

¹⁸ “Idi do' muyuh ngikit tuda'-tuda' lun luk mutut besara' idi teh tuda'-tuda' lun rayeh bang amung bawang muyuh luk barén Tuhan Allah muyuh nemuyuh, rat anid pupu muyuh. Idi ideh miak mutut besara' kuan lun mula' ku ukum luk muned.

¹⁹ Aleg ideh ngelipa ukum. Aleg ideh mili' lemulun. Aleg ideh ngalap suap. Ngaceku baré ineh ngebuser mateh lun luk mileh idi ngekilu' bala lun luk matu.

²⁰ Do' muyuh maya' luk muned, pad muyuh tebawang bang bawang luk barén Tuhan Allah muyuh nemuyuh.

²¹ “Kareb muyuh mudut bubpun kuan Tuhan Allah muyuh, aleg naped ulung luk inan sembayang iringneh.

²² Idi aleg iko ngabpen diri akang luk inan Tuhan Allah muyuh megateh.