BADA' RATNAN UKUM 12 - BALA LUK DO'

Sembayang Déi' Su Luk Pilin Tuhan Allah

¹ “Do' ninger amung ukum luk miak bén muyuh bang bawang luk biré Tuhan Allah tepun muyuh nemuyuh, seruked ulun muyuh bang bawang ineh.

² Do' muyuh ngusag amung su luk inan pupu baken sembayang inan allahdeh bang bawang luk lapen muyuh, do' luun pegkung luk medita' idi luun surud, idi liang lawa kayuh pana'.

³ Ngusag amung bubpundeh, mila' amung diri akangdeh, ngeseb amung ulung luk inandeh sembayang, idi nangal amung akangdeh, pad ideh na sembayang su ineh peh.

⁴ “Aleg muyuh sembayang nan Tuhan Allah muyuh maya' dalan pupu ini.

⁵ Iamo' do' muyuh amé' su luk pilin Tuhan Allah muyuh ratnan babpat amung inul pupu muyuh. Ngaceku Ieh miak ngeletep ngadanNeh idi tudo ieneh.

⁶ Idi su ineh teh do' muyuh nguit amung baré luk sabpen muyuh, baré luk kereten muyuh, babpat pulu', baré luk iten muyuh, baré luk pijani' muyuh, baré muyuh ratnan katu niat, idi amung anak sapi' idi dumba muyuh luk atun.

⁷ Idi su ineh, do' muyuh idi uang tetek ruma' muyuh kuman pa kiung Tuhan Allah muyuh dengan mawang niat, ngaceku Tuhan Allah muyuh pangeh nengeperuan nemuyuh bang amung-amung luk ruen muyuh.

⁸ “Aleg muyuh nganau' maya' kudeng luk inau' muyuh su ini, ieh ineh anid-anid burur nganau' luk matu maya' terawédeh sebuleng.

⁹ Ngaceku nekini nateh muyuh nacing su luk inan muyuh ucu' idi bang bawang luk biré Tuhan Allah nemuyuh.

¹⁰ Iamo' muyuh miak guta Abpa' Yarden idi tudo bang bawang luk biré Tuhan Allah nemuyuh, idi kareb Ieh muit nemuyuh ratnan amung bunu' muyuh, kali' rungen muyuh do' udeng.

¹¹ Idi do' muyuh nguit amung luk pangeh bida'ku nemuyuh amé' su luk pilin Tuhan Allah muyuh, pad Ieh miak ngeletep ngadanNeh su ineh, do' baré muyuh luk sabpen, baré muyuh luk kereten, babpat pulu', baré luk iten muyuh, idi amung binaweh luk do', idi baré luk pijani' muyuh inan Tuhan.

¹² Idi do' muyuh geriguen pa kiung Tuhan Allah muyuh, do' muyuh dengan amung anak muyuh, amung lun tebarin muyuh, idi amung lun Liwi pana' luk tudo bang anid bawang muyuh. (Do' ngerawé lun Liwi luk na miak ngalap babpat tana' mepad kudeng muyuh.)

¹³ Aleg maré baré luk sabpen muyuh iapeh-iapeh luk pian muyuh;

¹⁴ iamo' su luk pilin Tuhan ratnan amung babpat inul pupu muyuh, su ineh do' muyuh maré baré luk sabpen muyuh, idi do' muyuh nganau' amung-amung luk badénku nemuyuh su ineh.

¹⁵ “Iamo' muyuh miak ngeret pung idi kuman uang maya' luk pian muyuh maya' kudeng luk barén Tuhan Allah muyuh bang amung su luk inan muyuh tudo' do' lun luk ku gani' idi lemulun luk meligan miak kuman ineh, ieh ineh talau idi payo.

¹⁶ Iamo' aleg muyuh kuman dara'. Do' muyuh ngutang ineh luun tana' mepad kudeng abpa'.

¹⁷ Idi bang bawang luk inan muyuh tudo na muyuh miak kuman babpat pulu' ratnan padé, abpa' anggur, umau saitun, sapi' idi dumba muyuh luk atun, binaweh luk pangeh pijani' muyuh, baré muyuh ratnan katu niat, idi baré luk iten muyuh.

¹⁸ Iamo' do' muyuh kuman ineh pa kiung Tuhan Allah muyuh su luk pilinNeh ineh, do' muyuh idi anak muyuh, lun tebarin muyuh, idi lun Liwi luk tudo bang bawang muyuh. Do' muyuh geriguen pa kiung Tuhan Allah muyuh bang amung-amung luk ruen muyuh.

¹⁹ Aleg kelupan nelun Liwi seruked muyuh tudo bang bawang ineh.

²⁰ “Kareb Tuhan Allah muyuh pangeh nengiuk lakan bawang muyuh maya' kudeng luk pijani'Neh nemuyuh, idi muyuh miak kuman uang pung maya' pian niat muyuh.

²¹ Idi kudeng su luk pilin Tuhan Allah muyuh inan sembayang mado rat su inan muyuh, miak muyuh ngeret ratnan sapi' idi dumba muyuh luk biré Tuhan nemuyuh, kenen su luk inan muyuh tudo maya' pian niat muyuh mepad kudeng luk bida'ku nemuyuh.

²² Mepad kudeng talau idi payo miak kenen, kudeng ineh teh do' muyuh kuman ineh, do' lun luk ku gani' idi lun luk meligan miak kuman ineh.

²³ Iamo' aleg kuman dara'. Ngaceku dara' ieh ineh ulun. Idi na muyuh miak kuman uang dengan ulunneh.

²⁴ Aleg muyuh kuman dara', iamo' ngutang ineh luun tana' mepad kudeng abpa'.

²⁵ Aleg muyuh kuman ineh, pad muyuh do' udeng idi anak inul muyuh pana' ngaceku muyuh nganau' luk matu pa kiung Tuhan.

²⁶ Do' muyuh nguit baré muyuh luk meligan, idi baré luk pijani' muyuh pana', amé' su luk pilin Tuhan.

²⁷ Idi maré baré luk sabpen muyuh, do' uangneh idi dara'neh luun bubpun Tuhan Allah muyuh. Do' ngutang dara' amung baré luk kereten muyuh luun bubpun Tuhan Allah muyuh. Iamo' uangneh miak kenen muyuh.

²⁸ Do' muyuh lutep maya' amung luk bida'ku nemuyuh, pad muyuh do' udeng idi anak inul muyuh pana' macing ruked-ruked, ngaceku muyuh nganau' luk do' idi luk matu pa kiung Tuhan Allah muyuh.

Aleg Sembayang Inan Akang

²⁹ “Tuhan Allah muyuh miak ngelaya' amung pupu ineh kareb muyuh ngerieng bawangdeh, idi muyuh miak tebawang su ineh.

³⁰ Kareb ideh pangeh linaya' Tuhan, matar do'-do', idi na maya' lawé sembayangdeh, pad muyuh na meraruh idi aleg ngitun ratnan lawé sembayangdeh, pad muyuh na nginud lawé ineh.

³¹ Aleg muyuh sembayang nan Tuhan Allah muyuh maya' lawé sembayangdeh ineh. Ngaceku amung luk ruendeh kuan allahdeh, ieh ineh pelaba dat pa kiung Tuhan, pad ideh ngeseb anakdeh pana' luun bubpundeh.

³² “Do' maya' amung luk bida'ku nemuyuh.Aleg muyuh ngeluun, idi aleg muyuh ngurang bala ineh.