BADA' RATNAN UKUM 11 - BALA LUK DO'

Rayeh Tuhan

¹ “Do' muyuh mawa inan Tuhan Allah muyuh, idi megéi' maya' amung ukumNeh.

² Do' muyuh ngerawé nekini ratnan amung luk kali' muyuh ratnan Tuhan. Baken anak-anak muyuh, iamo' muyuh sebuleng luk pangeh nekali' amung ineh. Muyuh nenier rayeh Tuhan dengan lalud idi tuehNeh,

³ idi tanu'-tanu'Neh pana'. Muyuh nenier luk pangeh inau'Neh kuan raca' Masir idi amung imetneh.

⁴ Muyuh nenier Tuhan nengusag baweh Masir, dengan amung kudadeh idi amung kerétadeh, ngaceku Ieh nengened nedeh bang Abpa' Pisui, kareb ideh nengerada' nemuyuh.

⁵ Muyuh kali' luk inau' Tuhan kuan muyuh déi' su luk ali-ali, kareb nateh muyuh nacing su ini.

⁶ Muyuh kali' luk inau'Neh kuan Datan idi Abiram luk anak Eliab luk inul Rubin. Tana' ineh netenganga' idi nenelen ruma'deh idi lepodeh, dengan amung demulun idi aya'deh.

⁷ Matu muyuh luk pangeh nenier amung kekamen luk rayeh luk inau' Tuhan.

Peruan Tuhan Bang Bawang Kanaan Luk Pijani'Neh

⁸ “Do' muyuh maya' amung ukum luk bida'ku nemuyuh aco sini, pad muyuh metueh idi semuet bang bawang luk inan muyuh miak tebawang.

⁹ Idi muyuh mio tebawang bang bawang luk pangeh pijani' Tuhan kuan tepun muyuh idi inuldeh, ieh ineh aceh tana' luk mebaleng.

¹⁰ Bawang luk ulek muyuh nekini baken kudeng bawang Masir, su luk inan muyuh tudo atun idi luk inisak muyuh ku ilung idi luk binubpur muyuh sebuleng, mepad kudeng kabun irin.

¹¹ Iamo' tana' luk ulek muyuh ieh ineh tana' luk mula' pegkung idi ruan, luk meba'ku udan.

¹² Ieh ineh tana' luk isa' Tuhan Allah muyuh ruked lak.

¹³ “Do' muyuh maya' amung ukum luk bida'ku nemuyuh aco sini, pad muyuh mawa inan Tuhan Allah muyuh idi maya' Neneh dengan amung niat muyuh idi amung terawé muyuh teh,

¹⁴ pad Ieh maré udah luun tana' muyuh maya' karebneh, ieh ineh udah luk pun idi udan luk kekiped, pad muyuh ngamung padé, abpa' anggur, idi umau saitun muyuh.

¹⁵ Idi Ieh miak maré uduh kuan amung aya' muyuh, idi muyuh miak kuman macing mebor.

¹⁶ Matar do'-do' pad muyuh na saluken, pelé muyuh na teketed idi lemubed maya' allah baken idi sembayang nedeh.

¹⁷ pelé Tuhan na museh nemuyuh idi Ieh na ngitek langit pad na mudan, idi tana' pana' na miak inan uli', pad muyuh na metutu' ratnan bawang luk do' luk biré Tuhan kuan muyuh.

¹⁸ “Do' muyuh ngerawé amung ukum ini, idi nuet ineh bang niat muyuh. Ngabet ineh nan penguan muyuh, idi luun madu' muyuh pad muyuh megéi' ngerawé ineh.

¹⁹ Idi do' mada' ini kuan anak-anak muyuh idi do' muyuh megéi' mada' amung bala ineh kareb muyuh tudo bang ruma' muyuh, idi kareb muyuh nalan, idi kareb muyuh telubid pian rudap, idi kareb kulat pana'.

²⁰ Do' ngayud ineh luun diri tanga' ruma' muyuh idi luun amung tanga' muyuh,

²¹ pad ulun muyuh idi ulun anak-anak muyuh mekadang bang bawang luk pijani' Tuhan kuan tepun muyuh, ieh ineh seruked langit pa luun tana' ini.

²² “Matar do'-do' idi maya' amung ukum luk bida'ku kuan muyuh. Mawa inan Tuhan Allah muyuh, idi maya' amung dalanNeh, idi do' muyuh lutep Neneh.

²³ Idi Tuhan miak ngusu amung pupu ini rat pa kiung muyuh, idi muyuh pana' miak ngalap bawang tuda'-tuda' pupu luk meluun rayeh, idi meluun tueh rat nemuyuh.

²⁴ Amung su luk delanin muyuh ieh ineh kuan muyuh, rat su luk ali-ali macing déi' Lebanon, idi Abpa' Pirat macing Abpa' Rayeh luk pa acep aco.

²⁵ Idi seburur pana' nateh miak ngagka' nemuyuh. Tuhan Allah muyuh miak ngacing gegker idi tot nemuyuh pa luun amung tana' luk pangeh nedalan muyuh, maya' kudeng luk pijani' Tuhan nemuyuh.

²⁶ “Idi aco sini teh ui nganau' pa kiung muyuh peruan idi kediman,

²⁷ ieh ineh peruan kudeng muyuh maya' amung ukum Tuhan Allah muyuh luk bida'ku nemuyuh aco sini,

²⁸ idi kediman kudeng muyuh na maya' ukum Tuhan Allah muyuh, idi kudeng muyuh umai ratnan dalan luk bida'ku nemuyuh aco sini, pad muyuh maya' allah baken luk na inan muyuh nepekalai.

²⁹ Idi kareb Tuhan Allah muyuh pangeh nenguit nemuyuh amé' bang bawang luk ulek muyuh, idi do' muyuh mada' peruan ineh rat luun Surud Gerisim, idi kediman ineh rat Surud Ibal.

³⁰ (Dueh surud ineh pa acep aco Abpa' Yarden, iring dalan rayeh pa acep aco tana' lun Kanaani, luk tudo déi' luun Raked Yarden petutup ku bawang Gilgal muneng ku kayuh luk meraben déi' Moré.)

³¹ Nekini muyuh miak amé' guta Abpa' Yarden idi tebawang luun tana' luk barén Tuhan Allah nemuyuh. Idi kareb muyuh ngalap tana' ineh idi tudo ieneh,

³² do' muyuh matar do'-do', idi maya' amung ukum luk bida'ku nemuyuh aco sini.