BADA' RATNAN UKUM 10 - BALA LUK DO'

Musa Ngalap Ukum Pulu' Sekua' Teh

¹ “Idi kebala Tuhan negku, ‘Do' iko ngabang dueh balad batu, mepad kudeng luk atun ineh, idi uké amé' luun pegkung matun Negku. Idi do' iko mudut aceh pati' ratnan kayuh.

² Idi Ui miak ngayud luun balad batu ineh amung bala luk luun dueh balad batu luk atun luk pangeh binila'mu ineh. Idi do' iko ngerareng ineh bang pati' ineh.’

³ “Idi ui nemudut aceh pati' ratnan kayuh pirur. Idi ui nengabang dueh balad batu mepad kudeng luk atun di. Pangeh ineh idi ui nuké iné' luun pegkung idi nenguit dueh balad batu ineh.

⁴ Idi Tuhan nengayud luun batu ineh bala luk mepad kudeng ayud luk atun, ieh ineh ukum pulu' luk pangeh bida'Neh kuan muyuh rat luun pegkung idi rat uned apui kareb lun mula' ineh nepamung. Idi Tuhan nemaré dueh balad batu ineh negku.

⁵ Idi ui nelemubed idi musul ratnan pegkung. Idi dueh balad batu ineh rirengku bang pati' luk pangeh pinudutku, maya' kudeng hak bila Tuhan negku.”

⁶ (Idi lun Israil nenalan rat subuk-subuk lun Yakan iné' Mosera. Idi Arun naté, idi tinanem su ineh. Idi anakneh Eliasar mangun ku imam ku libalneh.

⁷ Idi rat su ineh ideh nenalan iné' Gudgoda idi rat Gudgoda nacing déi' Yotbata, ieh ineh tana' luk mula' abpa'.

⁸ Idi kareb ineh Tuhan nengatad inul Liwi, pad ideh mirir Pati' Pejani' Tuhan, pelé ideh tuped pa kiung Tuhan idi sembayang Neneh, idi maré peruan idi neten ngadanNeh macing aco sini.

⁹ Idi ngaceku ineh lun Liwi na ngalap babpat tana' dengan amung kinanakdeh. Iamo' Tuhan mangun ku babpatdeh maya' kudeng luk pijani' Tuhan Allah muyuh nedeh.)

¹⁰ “Idi ui netudo luun pegkung ineh apat ngepulu' aco apat ngepulu' dacem kinioneh, mepad kudeng luk atun. Idi Tuhan neninger negku sekua' teh, pad Ieh na sikal ngaté nemuyuh.

¹¹ Idi kebala Tuhan negku, ‘Do' iko lemubed idi nguyut pupu ineh, pad ideh miak semuet idi ngalap tana' luk pangeh pijani'Ku kuan tepundeh.’

Luk Pian Tuhan

¹² “Idi nekini pana', ninger O Israil, anunké luk pian Tuhan Allah muyuh ruen muyuh? Do' muyuh matot inan Tuhan idi maya' amung balaNeh. Idi mawa Neneh. Idi maya' Neneh dengan amung niat muyuh idi amung terawé muyuh.

¹³ Idi do' muyuh nginita amung ukumNeh idi amung balaNeh luk pangeh bida'ku nemuyuh aco sini, mangun ku luk do' kuan muyuh.

¹⁴ Idi Tuhan luk kuan langit luk meluun dita' pana', idi Ieh luk kuan tana' idi uangneh teh.

¹⁵ Iamo' Tuhan pangeh méi' kuan tepun muyuh, idi Ieh mawa nedeh, pad Ieh nemili' nemuyuh rat arang amung pupu, mepad kudeng luk pangeh mangun nekini.

¹⁶ Ngaceku ineh do' muyuh maya' bala Tuhan, idi aleg muyuh metueh niat.

¹⁷ Tuhan Allah muyuh ineh Allah pa luun amung allah, idi pa luun amung lalud. Ieh ineh luk meluun rayeh, idi melalud. Idi teh Ieh luk buren. Ieh na mili' lemulun, idi na ngalap suap.

¹⁸ Ieh mutut ukum luk matu kuan anak maté, idi decur tinula' pana'. Ieh méi' kuan lun sakai, idi maré akan idi ayung kuandeh.

¹⁹ Ngaceku ineh do' muyuh mawa nelun sakai. Ngaceku muyuh pana' atun mangun ku lun sakai bang bawang Masir.

²⁰ Do' muyuh matot inan Tuhan Allah muyuh idi sembayang Neneh idi lutep Neneh, idi pejani' ku ngadanNeh sebuleng mo'.

²¹ Ngubur Neneh! Ieh ineh Allah muyuh. Idi amung kekamen luk rayeh idi luk nan mawa luk inau'Neh kuan muyuh pangeh sinier muyuh.

²² Kareb tepun muyuh iné' bawang Masir amungdeh tudu' ngepulu' mo'. Iamo' nekini Tuhan Allah muyuh pangeh nengula' nemuyuh mepad kudeng gituen luk déi' langit.