BADA' RATNAN UKUM 1 - BALA LUK DO'

Bala Luk Pun-Pun

¹ Idi ini amung bala luk bida' Musa nelun Israil dipar Abpa' Yarden, déi' su luk ali-ali, ieh ineh déi' luun Raked Yarden luk petutup ku Sup, arang Paran dengan Topel, Laban, Haserot, idi Disahab.

² (Idi pulu' aceh aco mo' kiado lawédeh rat Pegkung Sinai maya' pegkung-pegkung Sir macing déi' Kadis Barnia.)

³ Idi aceh aco bulan pulu' aceh, bang lak luk keapat ngepulu', muci ratnan ideh nenalan rat Masir, idi Musa nepebala nelun Israil, maya' kudeng luk icuk Tuhan,

⁴ idi muci ratnan ieh pangeh nengelaya' ni Sihon, raca' lun Amori luk tudo déi' Hesbon, idi Og raca' Basan luk tudo bang bawang Asterot déi' tana' Edri.

⁵ Idi dipar Abpa' Yarden, déi' bawang Moab, Musa nengimun ngegala' ukum idi bada' Allah. Kebalaneh,

⁶ “Idi Tuhan Allah tau pangeh nepebala netau déi' Sinai, kebalaNeh, ‘Petap io muyuh tudo luun pegkung ini.

⁷ Idi do' muyuh nalan rat ieni amé luun pegkung lun Amori, idi amé' dengandeh luk tudo déi' luun Raked Yarden, do' luk luun raked, do' luk luun pegkung idi luk déi' Negeb, idi luk tudo déi' tangeb Abpa' Rayeh, ieh ineh amung tana' lun Kanaani idi Lebanon, macing abpa' luk rayeh, ieh ineh Abpa' Pirat.

⁸ Ieh ineh tana' luk Ui ini Tuhan nepejani' maré kuan tepun muyuh, ieh ineh Ibrahim, Isak, Yakub, idi inuldeh. Amé' muyuh tebawang su ineh.’ ”

Musa' Mili' Lun Luk Mutut Besara'

⁹ Kebala Musa, “Kareb ineh ui nepebala nemuyuh, ‘Ui sebuleng na miak mabeh nemuyuh.

¹⁰ Tuhan Allah muyuh pangeh nengula' nemuyuh, pad kinula' muyuh mepad kudeng gituen luk i langit.

¹¹ Do' Tuhan, Ieh ineh Allah tepun muyuh, ngula' nemuyuh meribu kua'. Do' Ieh maré peruan nemuyuh, maya' kudeng luk pijani' Tuhan nemuyuh!

¹² Iamo' kudeng apehké ui sebuleng miak mabeh amung susa' idi dureng muyuh?

¹³ Do' muyuh mili' lemulun luk mileh idi luk do' kali', idi luk pekalai nguyut ratnan inul-inul muyuh, pad ui miak ngikit nedeh mangun ku lun rayeh muyuh.’

¹⁴ Idi kebala muyuh, ‘Matu bala mineh.’

¹⁵ Idi ui nengalap lun rayeh ratnan inl muyuh, ieh ineh lemulun luk mileh idi luk pekalai nguyut, idi ui nengikit nedeh mangun ku lun rayeh muyuh, ieh ineh rayeh pa luun meribu burur, pa luun meratu burur, pa luun limeh ngepulu' burur, pa luun pulu' burur, idi pa luun amung inul muyuh.

¹⁶ “Idi ui neperiteteng nedeh, kebalaku, ‘Do' muyuh ninger ratnan amung lawé kinanak muyuh idi mutut ukum luk muned arang seburur dengan kinanakneh, idi lun sakai pana'.

¹⁷ Idi aleg muyuh mili' lemulun, do' lun dat, idi lun do' pana'. Aleg muyuh matot ku lemulun, ngaceku ukum ineh Allah kuan. Iamo' besara' luk pelaba ikat uen muyuh mutut, do' muyuh nguit amé' negku, pad ui miak mutut ineh.’

¹⁸ Idi kareb ineh teh ui pangeh nemada' ratnan amung luk miak ruen muyuh.

Lun Luk Icuk Iné' Nier Déi' Kadis Barnia

¹⁹ “Idi tau nenalan rat Sinai idi nemaya' su luk ali-ali, ieh ineh su luk rayeh luk inan matot, luk pangeh sinier muyuh, idi iné' déi' luun pegkung lun Amori maya' kudeng luk icuk Tuhan kuan tau. Idi tau nacing déi' Kadis Barnia.

²⁰ Idi kebalaku nemuyuh, ‘Idi nekini muyuh pangeh nacing pegkung lun Amori luk pangeh biré Tuhan Allah tau kuan tau.

²¹ Tuhan Allah tepun muyuh pangeh nemaré tana' ineh kuan muyuh. Amé' tebawang su ineh, maya' kudeng luk icukNeh. Aleg muyuh matot idi merapang.’

²² “Idi muyuh iné' negku, kebala muyuh, ‘Do' tau ngecuk tuda'-tuda' burur amé' pa atun tau, pad ideh nier tana' ineh kuan tau idi nguit bala ratnan dalan sapeh luk do' bén tau, idi ratnan bawang-bawang luk ulek tau.’

²³ “Idi bala ineh do' kali'ku. Idi ui nengalap seburur ratnan anid-anid inul muyuh, ieh ineh pulu' dueh burur.

²⁴ Idi ideh nenalan nuké pegkung idi nacing Ruan Eskol.

²⁵ Idi ideh nengalap bua'-bua' ratnan tana' ineh, idi nenguit kuan tau, kebaladeh, ‘Idi do' tu tana' luk pangeh biré Tuhan Allah tau kuan tau.’

²⁶ “Iamo' na muyuh sikal nalan amé' déi'. Iamo' muyuh megateh ku bala Tuhan Allah muyuh.

²⁷ Idi muyuh dureng-dureng bang lepo muyuh, kebala muyuh, ‘Ngaceku gatehNeh kuan tau idi Tuhan pangeh nenguit netau remuat rat bang bawang Masir, pian maré netau bang palad lun Amori, pad tau pederen.

²⁸ Kudeng apehké bawang luk ulek tau? Kali' rungen tau matot? Lun luk icuk ineh nepebala, “Idi ieh ineh aceh pupu luk rayeh idi metueh rat netau. Idi bawang-bawangdeh pana' rayeh muyuh.’ Idi kebala muyuh, ‘Matu langit. Idi teh kai pangeh nenier inul lun Enak luk rayeh burur déi'.” ’

²⁹ “Idi kebalaku nemuyuh, ‘Aleg muyuh matot nedeh.

³⁰ Tuhan Allah muyuh luk nalan pa atun muyuh miak pebunu' libal muyuh, mepad kudeng luk inau'Neh kuan muyuh déi' bawang Masir,

³¹ idi déi' su luk ali-ali. Muyuh sebuleng pana' nenier kudeng apeh Ieh pangeh nengabin nemuyuh mepad kudeng selemulun ngabin anakneh, bang amung lawé luk pangeh dinalan muyuh pad muyuh macing su ini.’

³² Iamo' sagan tu pana' kudeng ineh, nateh muyuh manu inan Tuhan Allah muyuh

³³ luk pangeh nenalan pa atun muyuh, idi luk nenicul su luk do' inan muyuh nelupo. Kareb malem Ieh nenalan bang apui idi kareb acang aco pana' bang laput, pad muyuh miak nier dalan luk bén muyuh.

Tuhan Allah Ngukum Nelun Israil

³⁴ “Idi kareb Tuhan neninger dureng muyuh Ieh pelaba useh. Idi ieh nepebulung, kebulungNeh,

³⁵ ‘Seburur pana' rat arang pupu luk dat ini nateh miak nier tana' luk do' luk pangeh pijani'Ku kuan tepun-tepun muyuh.

³⁶ Iamo' Kaleb Yepuneh mo' miak nier ineh. Ui maré tana' luk pangeh ridu'neh kuan Kaleb idi kuan anak-anakneh pana', ngaceku ieh pangeh lutep maya' Tuhan.’

³⁷ Idi Tuhan museh negku ngaceku muyuh. Idi kebalaNeh, ‘Iko pana' na miak semuet bang bawang ineh.

³⁸ Iamo' Yusak Nun luk ngedengan namu, miak semuet bang bawang ineh. Do' iko ngetueh neneh, ngaceku ieh luk miak nguyut nelun Israil, pad ideh tebawang su ineh.’

³⁹ “Idi kebala Tuhan netau, ‘Idi anak-anak muyuh luk pangeh tirawé muyuh miak mangun ku demulun, idi anak-anak muyuh luk isuut luk nateh nekali' do' idi dat, miak tebawang su ineh. Idi Ui miak maré bawang ineh kuandeh.

⁴⁰ Iamo' do' muyuh lemubed idi amé' su luk ali-ali maya' dalan luk amé' matun Abpa' Pisui.'

Israil Linaya' Déi' Horma

⁴¹ “Idi muyuh nengor balaku, ‘O Musa, kai pangeh mesala' inan Tuhan. Idi kai pian amé' pebunu' maya' amung bala Tuhan Allah kai nekai.’ Idi anid-anid muyuh ngayung ku ayung pebunu', ngaceku muyuh mekuu' pian umak pegkung ineh.

⁴² “Iamo' kebala Tuhan negku, ‘Do' mada' nedeh, Aleg muyuh amé' idi aleg pebunu', ngaceku Ui na idi arang muyuh, pad muyuh na uen amung bunu' muyuh ngelaya'.’

⁴³ Idi ui nepebala nemuyuh iamo' muyuh na neninger. Iamo' muyuh megateh ku bala Tuhan, idi dengan dita' niat, muyuh nuké pegkung ineh.

⁴⁴ Idi lun Amori luk tudo luun pegkung ineh iné' ngerada' nemuyuh mepad kudeng tebikan idi nengelaya' nemuyuh déi' bawang Edom macing Horma.

⁴⁵ Idi muyuh nelemubed idi nenangi' pa kiung Tuhan. Iamo' na Ieh neninger arod muyuh.

⁴⁶ Idi ngaceku ineh muyuh mio tudo déi' Kadis ineh.