AYUB 9 - BALA LUK DO'

Ayub

^1-2 Mo, ui pangeh neninger amung ineh atun. Iamo' lemulun na miak metueh ratnan Allah.

³ Kudeng ieh pesaad pa kiungNeh, Allah miak ngitun meribu itun luk na miak uen ngua'.

⁴ Allah mileh idi melalud, pad seburur pana' nateh luk metueh rat Neneh.

⁵ Denak-denak Ieh mubuh pegkung-pegkung, idi ngusag nedeh dengan usehNeh.

⁶ Allah ngeruyuh tana' ini, idi nguyu' amung diri tana'.

⁷ Allah miak mebpeng aco pad ieh na masat, idi gituen pana' pad ideh na merasat.

⁸ Seburur pana' nateh nengedengan Allah, kareb Ieh nemalad langit, idi kareb Ieh nengeradu' ribut abpa' rayeh.

⁹ Allah nenganau' gituen bang langit luk titen Beruang, Belatik, Puru', idi gituen luk pa kabing busat aco.

¹⁰ Kai na kali' ilung luk ruen Allah, idi kekamenNeh luk melalud na kekipedNeh.

¹¹ Allah lemaba, iamo' ui na miak nier Neneh.

¹² Ieh ngalap luk pianNeh, idi seburur pana' nateh miak mebpeng Neneh; seburur pana' na miak ngitun Neneh, “Anunké luk ruenMu?”

¹³ Useh Allah lutep. Ieh ngelaya' bunu'Neh luk nengedengan Rahab, pung luk rayeh bang abpa', luk sikal metueh rat Neneh.

¹⁴ Kudeng apehké ui nakap aceh bala luk pingua' ku bala Allah?

¹⁵ Sagan tu pana' ui na mesala', na luk miak ruenku, iamo' ui mutuh éi' ratnan Allah luk ngukum negku.

¹⁶ Sagan tu pana' Ieh nima' negku pebala, na ui merapet Neneh ninger balaku.

¹⁷ Ieh maré barui, pad Ieh necat idi ngeritep negku, dengan na punneh.

¹⁸ Kareb nateh ui miak nginiat, idi Ieh ngacing aceh dereh teh; amung-amung luk icingNeh negku nganau' negku mét niat.

¹⁹ Petuluké ui sikal metueh ratnan Allah? Petuluké ui nguit Neneh besara'? Idéké luk ngecuk Neneh amé'?

²⁰ Ui na mesala', idi ui lutep maya' Tuhan, iamo' balaku luk ngesala' idi ngukum negku.

^21-22 Ui na mesala', iamo' na mekudeh. Ui musam mulun. Na mekudeh; mesala' idi na mesala', Allah miak ngaté netau.

²³ Kudeng seburur lun luk na mesala' maté denak-denak Allah meriruh mo'.

²⁴ Allah nemaré tana' ini kuan lemulun luk dat. Ieh nenganau' amung lun luk mutut besara' mebuser. Idi kudeng na ini inau' Allah, idé luk nenganau' ineh?

²⁵ Ulunku meluun awer ratnan lun luk peribatun, idi sebuleng aco pana' na ngacing peruan kuanku.

²⁶ Ulunku lemaba mepad kudeng alud luk mawer, idi mepad kudeng awer kanui luk ngeladai.

^27-28 Kudeng ui merimud pian mekelupan étku, idi amung derehku lemubed amé' negku; ui kali' Allah ngerawé negku mesala'.

²⁹ Kudeng Allah ngerawé negku mesala', anunké ulekneh?

³⁰ Sabun na miak ngiu' sala'ku.

³¹ Allah nala' negku bang aceh lubang luk dat pad ayungku migu' negku.

³² Kudeng Allah ineh lemulun, miak ui ngua' balaNeh, pad kai amé' besara'.

³³ Iamo' seburur lemulun pana' nateh luk mangun ku gatum kai dueh Allah, pad ngukum nekai dueh.

³⁴ O Allah, ugka' ngedereh negku! Idi aleg ngatot negku!

³⁵ Ui na matot. Ui sikal pebala, ngaceku ui kali' niatku sebuleng.