AYUB 8 - BALA LUK DO'

Bildad

^1-2 Nabudké amung balamu luk mepad kudeng bui?

³ Allah na tu-tu ngisu' ukum luk mesiri; Ieh megéi' nganau' luk matu.

⁴ Kali' rungen anakmu nenganau' sala' pa kiung Allah, idi ini punneh Tuhan nengukum nedeh kudeng ineh.

⁵ Iamo' do' iko lumi inan Allah idi sembayang,

⁶ kudeng iko mesiri idi meligan, kali' rungen Allah amé' ngedengan namu, idi nuneb tetek ruma'mu ku ngua' do'mu.

⁷ Idi amung binawehmu luk netutu' na miak uen maad dengan luk barén Allah namu.

⁸ Ngerawé ratnan amung-amung ileh luk mon; idi bada' tepun tau.

⁹ Ulun tau pelaba kamu', pad tau na kali' anun-anun. Tau mepad kudeng aca' luun tana' ini.

¹⁰ Nima' lun mileh ineh mada' namu; do' ninger luk bida'deh:

¹¹ “Pisui na miak mulun, su luk na abpa'.

¹² Kudeng abpa' mekeket, pisui ineh luk mekarang atun ratnan uduh baken, kareb ideh medari.

¹³ Kudeng ineh teh lemulun luk na maya' Allah. Ideh mekelupan Allah, idi na merapet.

¹⁴ Ideh merapet ku tebaru kelawa'.

¹⁵ Kudeng ideh pucang nan tebaru kelawa', miakké ideh tuped meraben? Kudeng ideh ngimet tebaru ineh, miakké tebaru ineh tuman, pad ideh tuped?”

¹⁶ Lun luk dat temubu' mepad kudeng uduh, kareb mét idang; idi mepad kudeng uduh luk bang kabun.

¹⁷ Uatdeh ngawil amung bubpun batu idi teh amung batu luk bang tana' pana'.

¹⁸ Iamo' kudeng iko mubput amung ineh, na lun kali' su luk inandeh.

¹⁹ Ineh mo' awang lemulun luk dat; lun baken amé' ku libaldeh.

²⁰ Iamo' Allah na necan lemulun luk lutep maya' Neneh, idi na Ieh ngedengan lemulun luk dat.

²¹ Ieh maré namu meriruh idi ngitang sekua' teh,

²² iamo' Ieh ngigu' lemulun luk megateh namu, idi ruma' lun luk dat miak uen ngusag.