AYUB 7 - BALA LUK DO'

¹ Ulun lemulun mepad kudeng kekamen lun pebunu', idi mepad kudeng ulun lun luk ngakem luk meberat,

² mepad kudeng lun tebarin luk pian ku su luk melungung, idi mepad kudeng lemulun luk nganét tabparneh.

³ Anid-anid bulan na ulekku mulun; anid-anid dacem ui mesusa'.

⁴ Kareb ui telubid pian rudap, pelaba kadang dacem ineh; ui na merudap, iamo' ui nginulat aco macang mo'.

⁵ Bururku maput ku uled idi turak, idi nana' puruhku remuat.

⁶ Amung aco luk nepelaba na luk inan merapet, idi aco ineh meluun awer ratnan luk pinguuk lun luk ngebaruh.

⁷ O Allah, ngerawé ratnan ulunku ini bui mo', idi nabud awang niatku.

⁸ Iko nier negku nekini, iamo' na Iko nier negku baruh. Kudeng Iko nakap negku, ui na idi.

^9-10 Mepad kudeng laput luk nalan idi na idi, kudeng ineh teh lemulun maté idi na lemubed; lemulun luk pekalai neneh na ngerawé neneh teh.

¹¹ Ui na miak ungeng! Ui mesusa' idi museh! Na miak na ui pebala!

¹² Ngudehké Iko matar negku? Inanké ui aceh pung luk rayeh luk bang abpa'?

¹³ Ui telubid pian ngato erurku, pad luk métku miak do'.

¹⁴ Iamo' bang nupi Iko ngatot negku. Iko maré luk siren idi nupi luk ngagap,

¹⁵ pad ui pian uen lun ngabet dier, pelé ui maté, idi na medereh.

¹⁶ Ara' ui mulun. Mabud tuehku! Do' necan negku. Na ulek ulunku.

¹⁷ Ngudehké Iko ngerawé lemulun, idi nier amung luk ruenneh?

¹⁸ Iko nier neneh anid pekak, idi megéi' nutun neneh.

¹⁹ Ngudehké Iko na teketed rat negku, pad ui nelen aka'ku?

²⁰ Inanké Iko medereh ku sala'ku? O Iko luk megéi' nier lemulun! Ngudehké Iko nganau' negku ku luk badilin? Ngudehké ui mangun ku babeh kuanMu?

²¹ Naké Iko miak maré do' ratnan datku, idi ngiu' sala'ku? Na mio teh ui miak telubid bang tanem, idi ui na idi kareb Iko nakap negku.