AYUB 6 - BALA LUK DO'

Ayub

^1-2 Kudeng susa' idi derehku uen nimang,

³ ideh meluun berat ratnan bada luk tangeb abpa' rayeh, kali' rungen balaku na petulu.

⁴ Allah luk Melalud nengeput negku ku langan idi parirneh nubpa' bang bururku. Allah ngelaya' negku ku amung luk katot.

⁵ Keladai mawang niat karebneh kuman uduh, idi sapi' do' udeng karebneh kuman tucu'.

⁶ Iamo' idéké miak kuman kikid luk metalang? Inanké én binuda' terur?

⁷ Ui na pian kuman luk kudeng ineh, idi amung-amung luk kenenku nganau' negku mét.

⁸ Ngudehké Allah na maré luk pituenku? Ngudehké Ieh na ngua' sembayangku?

⁹ Meluun do' Ieh petacu ngaté negku,

¹⁰ pad ui uput ku awang niatku, sagan tu pana' medereh. Ui kali' Allah ineh meligan; na tu ui ngelaba luk icukNeh rat mon.

¹¹ Anunké ku tuehku, pad ui mulun. Anunké ulekku mulun kudeng ui na inan rapet?

¹² Inanké ui inau' ratnan batu? Tekalingké bururku?

¹³ Ui na miak ngedengan bururku sebuleng; nabud tuehku idi na lun ngedengan negku peh.

¹⁴ Sagan tu pana' ui belén lun necan Allah, petulu inan lun rurum luk ngedengan negku bang susa'.

¹⁵ Iamo' muyuh luk rurumku naluk negku, mepad kudeng arur kareb merikan.

^16-17 Arur ineh mepanu' ku salju idi batu ais, iamo' kareb melau' salju idi ais ineh na idi, idi arur ineh mekeket.

¹⁸ Lun luk nalan meraruh karebdeh nakap abpa'; pad ideh maté déi' su luk ali-ali.

¹⁹ Lun luk nalan rat Siba idi Tema nakap abpa'.

²⁰ Iamo' na rapetdeh kareb ideh macing ku arur luk na abpa'.

²¹ Muyuh pana' mepad kudeng arur ineh sirenku; muyuh megagap nier derehku.

²² Inanké ui nemutuh nemuyuh maré aceh baré negku? idi maré aceh suap nelun kuanku,

²³ idi ngulun negku ratnan bunu' idi lun luk dat?

²⁴ Do' mada' negku; mada' sala'ku, ui miak ungeng idi ninger bala muyuh.

²⁵ Kudeng bala muyuh do' miak ui buken lek, iamo' bala muyuh mebacé.

²⁶ Muyuh ngerawé balaku mepad kudeng bui; ngudehké muyuh ngua' luk bilaku karebku mesusa'?

²⁷ Miakké muyuh ngedereh anak maté, idi masui nelun rurum muyuh?

²⁸ Nier negku, na ui mebalih.

²⁹ Petap adu' muyuh negku, Aleg muyuh nganau' luk na mesiri. Aleg ngadu' negku. Ui ini mesiri.

³⁰ Iamo' muyuh ngerawé negku mebalih — muyuh ngerawé negku na kali' luk mesiri idi luk tekilu'.