AYUB 5 - BALA LUK DO'

¹ O Ayub, do' iko ngitang. Inanké lemulun luk ngor tangmu? Inanké melaikat luk inanmu merapet?

² Mebacé iko maté ku ét niatmu.

³ Ui pangeh nekali' lun mebacé luk ayudeh do' udeng, iamo' denak-denak ui ngacing kediman kuan ruma'deh.

⁴ Idi anakdeh na miak do' udeng, pad na lemulun miak ngedengan nedeh bang besara'.

⁵ Lemulun luk melau kuman padé lun luk mebacé — padé luk mulun arang tabpa' pana — idi lun luk meparing pana' melili ku binawehneh.

⁶ Luk dat na miak mulun bang tana', idi susa' na miak temubu' luun lati'.

⁷ Lemulun ngacing susa' kuan bururneh sebuleng, mepad kudeng anak apui luk temulud.

⁸ Kudeng ui iko, ui miak lumi inan Allah, idi nguit adu'ku amé' Neneh.

⁹ Kai na kali' ilung kekamenNeh luk rayeh, idi na kekiped tanu'Neh luk inan mawa.

¹⁰ Ieh maré udan luun tana' idi mubpur amung lati'.

¹¹ Allah ineh luk ngikit nelun luk masi', idi ngawang niat lun luk temido.

^12-13 Ieh ngusag gayam lemulun luk naluk; Ieh nganau' lun mileh mekaneh abpungdeh sebuleng, pad amung-amung luk ruendeh na mangun;

¹⁴ kareb macang aco pana' ideh ngakap-ngakap, mepad kudeng kareb medacem.

¹⁵ Iamo' Allah ngulun nelun masi' ratnan até; idi muit nelun luk melaya' rat nelun luk ngedereh nedeh.

¹⁶ Ieh maré rapet nelun luk masi', idi niep tang lun luk dat.

¹⁷ Samal kuan lemulun luk badén Allah! Aleg mét niat kareb Ieh mada' namu.

¹⁸ Tuhan ngabet urat luk inau'Neh; ticu'Neh ngurat namu, idi teh ticu'Neh ngedo' namu.

¹⁹ Megéi' kua' Ieh ngulun namu ratnan susa'.

²⁰ Ieh ngulun namu kareb inan iru', idi matar namu ratnan até, kareb inan bunu'.

²¹ Allah muit namu rat nelun luk ngedat. Ieh ngulun namu kareb até macing.

²² Iko miak meriruh kareb inan susa' idi lau, idi na matot ku pung luk mesangit.

²³ Lati' luk uenmu ngeradu na inan batu, idi pung luk mesangit na ngaté namu.

²⁴ Iko miak tudo bang lepomu dengan na susa', kareb iko nier dumbamu na luk na idi.

²⁵ Idi anakmu mepad kinula' uduh.

²⁶ Iko miak mulun macing mengered, mepad kudeng padé luk temubu' macing uen ngeranih.

²⁷ O Ayub, mio tu-tu kai pangeh nesibada' ini. Kai kali' ini matu. Ngerawé do'-do'!