AYUB 42 - BALA LUK DO'

¹ Idi Ayub nengor bala Tuhan.

Ayub

² O Tuhan, Iko luk melalud; idi Iko miak nganau' amung-amung luk pianMu.

³ Iko ngitun idéké luk na manu ku ilehMu, ngaceku ieh mebacé. Ui ini luk nepebala ratnan amung-amung luk na kali'ku, ieh ineh kekamenMu luk inan mawa.

⁴ Iko nengecuk negku ninger kareb Iko nepebala, pad ui nutun ngor balaMu.

⁵ kareb ineh ui nekali' luk bila lun baken mo', iamo' nekini ui pangeh nenier Namu dengan matehku sebuleng,

⁶ idi ui migu' ngaceku amung luk bilaku, idi nekini ui uren tu-tu.

Kekipedneh

⁷ Kareb Tuhan pangeh nepebala amung-amung ineh kuan Ayub, idi kebalaNeh ni Elipas, “Ui museh namu idi nan dueh rurummu ineh ngaceku na meteluh nemala luk matu ratnan Ui, kudeng demulunKu Ayub.

⁸ Do' nguit kuan Ayub tudu' sapi' deléi' idi tudu' dumba deléi' barén meteluh ku baré luk sabpen kuan burur meteluh sebuleng. Idi Ayub miak sembayang kuan meteluh, idi Ui miak ngor sembayangneh idi na Ui ngigu' nemeteluh maya' ukum luk petulu. Meteluh na nemala luk matu ratnan Ui, mepad kudeng Ayub.”

⁹ Elipas, Bildad, idi Sopar nenganau' luk icuk Tuhan nediteluh, idi Tuhan nengor sembayang Ayub.

¹⁰ Idi kareb Ayub pangeh nesembayang kuan teluh rurumneh ineh, idi Tuhan nengeperuan neneh, idi nemaré kuanneh dueh kua' kinula' amung binawehneh luk atun.

¹¹ Amung kinanak Ayub luk deléi idi decur idi teh rurumneh luk atun nengikak neneh idi iné' ku irau bang ruma'neh. Ideh nemada' éi'deh idi nengubuk neneh ngaceku amung susa' luk icing Tuhan neneh. Anid bururdeh nemaré kuanneh usin idi susing amas.

¹² Tuhan nengeperuan kekiped ulun Ayub meluun ratnan ulunneh luk atun. Ayub inan 14,000 dumba, 6,000 unta, 2,000 sapi', idi 1,000 keladai.

¹³ Ieh nenginul tudu' anak deléi, idi teluh anak decur.

¹⁴ Anak decurneh luk atun, ngadanneh Jemima, idi luk kedueh, ngadanneh Kesia, idi luk keteluh, ngadanneh Karen Hapuk.

¹⁵ Aput tana' ini na luk idi decur luk meluun taga ratnan anak Ayub. Idi tamandeh nemaré kuandeh aceh babpat ratnan binawehneh mepad kudeng luk biréneh kuan anakneh luk deléi.

¹⁶ Muci ratnan ineh Ayub mulun 140 lak, pad ieh kali' mupunneh luk kedueh inul.

¹⁷ Idi ieh naté kareb ieh pelaba ngered.