AYUB 41 - BALA LUK DO'

¹ Miakké iko ngalap galau ku keluit, idi ngabet dila'neh ku kalat?

² Miakké iko ngabet icungneh ku kalat, idi nganau' keluit bang tangneh?

³ Miakké ieh mutuh namu muit neneh idi méi' neneh?

⁴ Miakké ieh pejani' namu, pad ieh ngakem kuanmu ruked-ruked?

⁵ Miakké iko maman neneh, mepad kudeng suit aya', luk inan demulunmu luk decur marot?

⁶ Miakké lun luk ngerabat pesingaro neneh? Miakké lun luk pepua' natek neneh pad ieh pisuen?

⁷ Miakké iko mayung neneh ku busu lawid? Miakké iko napeh uluhneh ku busu?

⁸ Ngakem nenek sekua' mo', idi kali' rungen iko na mekelupan sangitneh, pad iko na mekuu' nutun neneh sekua' teh.

⁹ Idé-idé luk nier galau ieh melaya' idi meluka'.

¹⁰ Kudeng iko ngegio neneh ieh pelaba sangit; seburur pana' nateh luk mekuu' tuped pa kiungneh.

¹¹ Idéké miak amé' matun neneh idi ieh mulun? Seburur pana' luk bang tana' ini na miak.

¹² Nima' negku mada' namu ratnan kukud galau, idi ratnan tuehneh luk pelaba rayeh.

¹³ Idéké miak ngalap kubilneh idi napeh ayungneh?

¹⁴ Idéké miak ngecuk neneh ngukab tangneh, luk inan lipen luk katot.

¹⁵ Ketedneh inau' ratnan utap luk pilalad, luk inabet idi metueh mepad kudeng batu.

¹⁶ Anid utap inabet mepicet, pad bui na miak semuet arangdeh.

¹⁷ Ideh inabet pelaba picet pad ideh na mekusag.

¹⁸ Kareb ieh mepia' inan luk merasat, idi matehneh merasat mepad kudeng aco masat.

¹⁹ Apui mebudung rat bang tangneh, idi anak apui pana' remuat.

²⁰ Rabpun remuat rat bang icungneh, mepad kudeng rabpun uduh luk sabpen pa liang lacang.

²¹ Niatneh nganau' apui; ngaceku apui uput rat bang tangneh.

²² Dierneh pelaba tueh pad idé-idé luk papu' neneh matot.

²³ Aput kubilneh luk melaya', iamo' metueh mepad kudeng belawan.

²⁴ Niatneh mepad kudeng batu tekalan, idi na ieh matot.

²⁵ Kareb ieh tumui amung lalud pana' matot pad ideh melaya'.

²⁶ Pelapet na miak ngurat neneh; busu, ileb, idi karit na miak ngedereh neneh.

²⁷ Pa kiungneh belawan mepad kudeng geramih, idi tekaling mepad kudeng kayuh luk merapuk.

²⁸ Na ieh matot ku ileb; idi batu luk ku mitung neneh, mepad kudeng geramih mo'.

²⁹ Pa kiungneh peper mepad kudeng geramih teh, idi ieh meriruh kareb lemulun mayung neneh.

³⁰ Lisunneh mepad kudeng bila' seréi'; ideh ngukut tana' luk meburi kareb ieh nalan.

³¹ Ieh nibur abpa' rayeh pad ieh meborak, kudeng abpa' luk tinaken idi umau pana'.

³² Pa puetneh dalanneh merasat, idi abpa' rayeh mebuda' ku lapa'.

³³ Aput tana' na luk mepad kudeng ieh; ieh ineh aceh pudu luk na matot.

³⁴ Ieh luk melun dita' ratnan amung-amung pung luk rayeh; idi teh ieh ineh raca' amung pung luk meliput.