AYUB 40 - BALA LUK DO'

Tuhan

^1-2 O Ayub, iko nepesaad pa kiung Allah luk Melalud, pianké iko pirud, kian iko pian ngor lek?

Ayub

^3-4 O Tuhan balaku mebacé. Anunké luk ruenku ngor? Na ui pian pebala peh.

⁵ Macing nekini pelaba ula' balaku.

⁶ Idi Tuhan nepebala ni Ayub rat bang barui.

Tuhan

⁷ Do' iko tuped kudeng seburur deléi, idi ngor itun luk tuninKu namu.

⁸ Pianké iko mala Ui na mesiri, pad ngesala' negku idi ngamo bururmu matu?

⁹ Metuehké iko kudeng Ui? Miakké iko rayeh arod mepad kudeng Ui?

¹⁰ Kudeng pieh kudeng ineh, do' ngayung ku ubur idi dita'mu.

¹¹ Nier lemulun luk medita' niat idi ngebeneh nedeh ku usehmu.

¹² Ngaté lemulun luk dat, su luk inandeh tuped.

¹³ Idi do' nanem nedeh, idi ngabet nedeh bang su luk inan até.

¹⁴ Idi Ui luk pun-pun ngubur namu, idi ngamo namu luk metueh.

¹⁵ Do' nier temacur. Ui nemudut neneh. Idi Ui nemudut namu teh. Ieh kuman uduh mepad kudeng sapi',

¹⁶ iamo' pelaba tueh bururneh!

¹⁷ Iurneh tuped mepad kudeng aceh kayuh tumuh, idi kukudneh pana' metueh.

¹⁸ Tulangneh mepad kudeng tekaling, idi kukudneh mepad kudeng belawan.

¹⁹ PudutKu luk meluun inan mawa pad Luk Mudut neneh mo' miak ngelaya' neneh.

²⁰ Uduh luk kenenneh iten rat luun pegkung, su luk inan pung luk meliput marot.

²¹ Ieh telubid iang kayuh luk metabpa', idi sigapung nan uduh luk nan tana' payeh.

²² Kayuh luk metabpa' idi bulu' luk tangeb abpa' nucung neneh.

²³ Ieh na matot ku paru' abpa'; ieh na megagau ku abpa' melipak amé' luun kiungneh.

²⁴ Idéké miak ngebuser neneh, pad ngakem neneh? Idi idéké miak ngabpung icungneh?