AYUB 4 - BALA LUK DO'

Gayam Luk Pun-Pun (4.1–14.22) Elipas

^1-2 O Ayub, mét niatmu kudeng ui pebalaké? Ngaceku na ui miak ungeng teh.

³ Iko pangeh nemada' mula' lemulun idi nengetueh ticu'deh luk melaya'.

⁴ Kareb seburur luk melaya' idi merur metebaceng, balamu luk nengubuk neneh pad ieh tuman.

⁵ Iamo' nekini iko nekaneh susa', idi iko negagap pad iko na miak tuman.

⁶ Iko nesembayang inan Allah, idi na iko nenganau' sala'. Petulu iko merapet.

⁷ Ngerawé do'-do'! Inanké seburur lemulun luk matu mekaneh susa'?

⁸ Ui pangeh nenier lemulun ngeradu lati' sala'deh, idi nengisak luk dat mepad kudeng padé, idi nekini ideh ngeranih dat idi sala' teh.

⁹ Dengan usehNeh Allah nginiat mepad kudeng barui, pad ideh maté.

¹⁰ Lun luk dat ngarod idi ngeku mepad kudeng balang, iamo' Allah ngagka' aroddeh idi mila' lipendeh.

¹¹ Mepad kudeng balang luk na luk kenen, ideh maté idi anak-anakdeh urap-urap.

¹² Inan sekua' aceh bala nacing negku kareb ali-ali, pad bala ineh lélé na miak pedingerenku.

¹³ Ieh mepad kudeng nupi luk ngesabeng rudapku.

¹⁴ Ui megegker niat; amung bururku pana' megegker teh.

¹⁵ Aceh bui iné' luun kiungku, pad luunku merinit.

¹⁶ Idi kareb ineh ui nenier aceh luk tuped. Ui nenutong, iamo' na miak kali' ayuneh. Idi ui neninger aceh arod kareb ali-ali.

¹⁷ Kebalaneh, “Inanké aceh lemulun luk matu pa kiung Allah? Inanké aceh lemulun luk meligan pa kiung Lun luk nemudut neneh?

¹⁸ Allah na merapet inan lun luk dukenNeh rat déi' surga, Ieh kali' sala' melaikatNeh pana'.

¹⁹ Miakké Ieh merapet inan aceh pudut luk ratnan tana' salit, luk inau' ratnan kipu luk uen ngareg mepad kudeng belebpang?

²⁰ Aceh lemulun miak mulun pekak, iamo' maté kareb nateh malem dengan na lun kali'.

²¹ Amung binawehneh miak lapen; idi ieh maté, kareb nateh ieh ngalap ileh.”