AYUB 39 - BALA LUK DO'

¹ Kali'mu kareb amék uen nenganak luun pegkung? Pangehké iko nenier poyo nenganak?

² Miakké iko ngiap bulan, idi kali' ratnan kareb anakdeh uen nenganak?

³ Kali'mu kareb ideh tekeradung ngeruat anakdeh?

⁴ Déi' bang pulung anakdeh mangun metueh, ideh buro idi na lemubed.

⁵ Idéké luk nemuit keladai luk meliput, pad ideh nalan maya' piandeh?

⁶ Ui nemaré su luk ali-ali, ieh ineh raked luk inan lubang tucu', mangun ku su inandeh.

⁷ Ideh nalan mado rat ku bawang rayeh, pad ideh na uen ngelayo idi na ngakem.

⁸ Amung pegkung mangun ku lamandeh, su luk inandeh nakap uduh kenendeh.

⁹ Miakké kelio ngakem kuanmu? Pianké ieh rudap bang libungmu?

¹⁰ Miakké iko ngimet neneh ku kalat pad ieh ngeradu? Miakké ieh ngeruid ragus luun lati'mu?

¹¹ Miakké iko merapet ku tuehneh luk rayeh, idi ngecuk neneh nganau' kekamenmu luk meberat?

¹² Miakké ieh mabeh luk perinienmu, idi ngamung padé rat su luk inanmu rumik?

¹³ Pelaba saget kayep ilad suit unta! Iamo' suit unta na temulud kudeng manuuk.

¹⁴ Suit unta ngiterur luun tana' pad ideh melau' ku lau' tana'.

¹⁵ Na ieh ngerawé kukud lemulun luk ngeradu' nedeh, idi pung luk meliput luk macit nedeh.

¹⁶ Ayuneh terur ineh baken ieh kuan; na ieh megagau ratnan luk inau'neh mo'-mo'.

¹⁷ Ui ini luk nenganau neneh mebacé, idi Ui na nemaré ileh kuanneh.

¹⁸ Iamo' kareb ieh upun, ieh miak situnga inan kuda idi teh lun luk maya' kuda ineh.

¹⁹ O Ayub, ikoké luk nenganau' kuda metueh? Idi nemaré buluh luk mekadang luun dierdeh?

²⁰ Ikoké luk nenganau' nedeh uput mepad kudeng kato, idi ngatot lemulun ku unideh?

²¹ Ideh peritamid mawang niat luun raked, idi ideh upun amé' pebunu' dengan amung tuehdeh.

²² Na ideh mileh matot, idi teh na ideh buro ku pelapet.

²³ Repapeh lun luk pebunu' pék-pék, idi mesilo ku acang aco.

²⁴ Kuda megegker ku gagaudeh, idi ideh perigéi' upun amé' pa atun; idi kareb serupit muni ideh na miak ungeng.

²⁵ Anid serupit muni ideh pana' muni. Ideh miak muen bunu' kareb nateh ideh muneng ku bunu' ineh. Idi ideh ninger arod lun rayeh pebunu'.

²⁶ Miakké kanui sibada' temulud rat namu, kareb ieh malad iladneh pa kabing busat aco?

²⁷ Miakké kanui nganét ukummu, kareb nateh ieh nganau' ararneh luun pegkung?

²⁸ Ieh nganau' ruma'neh luun batu luk meluun dita', idi buduk pegkung mangun ku libungneh.

²⁹ Rat su ineh ieh nier muneng idi mado pad ieh ngalap luk kenenneh.

³⁰ Amung kanui pamung iring butung, idi anak-anakdeh ngirup dara' butung ineh.