AYUB 38 - BALA LUK DO'

Tuhan Ngor Bala Ayub

¹ Idi rat bang barui Tuhan nepebala ni Ayub

Tuhan

² Idéké iko luk na manu ku ilehKu? Iko ngegala' bacému mo'.

³ Do' iko tuped kudeng seburur deléi idi ngor itun luk tuninku namu.

⁴ Iapehké iko kareb ui nemudut tana' ini? Kudeng iko pelaba ileh do' mada' negku.

⁵ Idéké luk nemutut kirayehneh? Idéké luk nenari neneh? Iko kali' ratnan iniké?

⁶ Anunké luk ngimet diri tana' ini? Idéké nengerareng baru lidung tana' ini?

⁷ Aco sineh, kareb aco masat amung gituen menani dengan awang niat dengan anak-anak Allah.

⁸ Idéké ngitek tanga', pad ngeleleng abpa' rayeh, kareb ieh nuput rat bang tana'?

⁹ Ui ini luk mapen abpa' rayeh ku laput, idi nanga neneh ku dacem.

¹⁰ Ui ini nengeletep lakan abpa' rayeh, idi nengeleleng ku tanga' luk pilin.

¹¹ KebalaKu, “Pad ini mo'! Ributmu luk rayeh na miak na ugka' su ini.”

¹² O Ayub, ruked ulunmu, pangehké iko nengecuk aco masat?

¹³ pangehké iko nengecuk aco masat ngeruyuh tana', pad lemulun luk dat remuat rat bang su luk inandeh sigapung?

¹⁴ Acang aco ngegala' surud idi ruan, mepad kudeng gerinet kuyu'.

¹⁵ Acang aco meluun rasat kuan lemulun luk dat, idi mebpeng nedeh na nganau' luk dat.

¹⁶ Pangehké iko iné' bang ribaruh abpa' rayeh? pangehké iko nenalan luun apin abpa' rayeh?

¹⁷ Pangehké lemulun mada' sirenmu amung tanga' su luk inan até?

¹⁸ Kali'mu kudeng apeh kirayeh tana' ini? Kudeng iko kali', do' iko ngor balaku.

¹⁹ Kali'mu rat su apeh inan acang, idi teh rat su apeh inan dacem?

²⁰ Miakké iko mada' acang idi dacem ineh, ratnan ulekdeh idi teh su luk inandeh?

²¹ Kali' rungen iko miak, ngaceku iko pelaba ngered, iko pangeh tinganak kareb nateh tana' ini pinudut!

²² Pangehké iko nenier takep luk inanKu nganug salju idi udan batu?

²³ Ui temina' ku ineh kuan kareb luk inan susa', ieh ineh kareb inan bunu'.

²⁴ Pangehké iko iné' su luk inan aco masat, idi su irat bui rat pa busat aco?

²⁵ Idéké nengukat abang kuan udan luk mula' idi nengukab dalan kuan barui idi lalam?

²⁶ Idéké maré udan su luk na lemulun?

²⁷ Idéké mubpur tana' luk tekering pad inan uduh?

²⁸ Inanké taman udan idi ipup?

²⁹ Idéké tinan abpa' batu ais idi luk meteneb,

³⁰ luk ngisu' abpa' mangun ku batu, idi abpa' rayeh pana'?

³¹ Miakké iko ngabet gituen Puru' idi neka abet gituen Belatik?

³² Miakké iko mada' luk ruen gituen bang anid-anid kareb, idi mada' gituen Beruang luk Rayeh idi Beruang luk Isuut?

³³ Kali'mu ukum luk kuan langit, pad iko mileh makai ukum ineh luun tana'?

³⁴ Miakké iko ngitang mada' laput, pad ideh nganau' namu meba' ku udan?

³⁵ Kudeng iko ngecuk kilep merasat, miakké ieh amé' namu idi pebala, “Tungé' ui”?

³⁶ Idéké mada' suit Ibis ratnan kareb Abpa' Nil temubu', idi teh idéké luk mada' kok ratnan acing udan?

^37-38 Idéké luk pelaba ileh ngiap laput, idi ngebiring nedeh pad inan udan, luk ngetueh abuh

³⁹ Miakké iko nakap luk kenen kuan balang idi ngebor anak balang luk melau,

⁴⁰ kareb ideh sigapung bang lubangdeh, idi ngabang?

⁴¹ Idéké luk maman bongkak kareb ideh temulud idi melau, kareb anakdeh ngitang mutuh akan rat Negku?