AYUB 37 - BALA LUK DO'

¹ idi sapi' kali' acingneh. Barui nganau' niatku megegker.

² O lun muyuh, do' ninger arod Allah, ieh ineh lalam luk remuat rat bang tangNeh.

³ Ieh maré kilep guta langit, rat iring tana' macing iring selipa.

⁴ Idi arodNeh pedingeren, ieh ineh uni lalam luk rayeh, idi megéi' kilep merasat.

⁵ Kareb Allah pebala, kekamen luk inan mawa mangun, luk na tau kali'.

⁶ Ieh ngecuk salju mebpeh luun tana', idi maré udan luk mula'.

⁷ Ieh ngagka' kekamen lemulun luk pinudutNeh, idi ngegala' kekamenNeh luk melalud.

⁸ Pung luk meliput amé' tudo bang lubangdeh.

⁹ Barui macing rat pa kabing busat aco, idi teneb rat pa tinueh busat aco.

¹⁰ Niat Allah ngisu' abpa' ku batu ais.

¹¹ Kilep remuat rat bang laput,

¹² luk lemibung maya' pian Allah. Ideh nganau' amung-amung luk duken Allah aput-aput tana' ini.

¹³ Allah mubpur tana' ini ku udan; rabpu'-rabpu' pelé ngukum lemulun idi rabpu'-rabpu' pad ngeperuan nedeh.

¹⁴ O Ayub, ungeng idi ninger; ngerawé amung kekamen Allah luk inan mawa,

¹⁵ Kali'mu kudeng apeh Allah ngecuk kilep remuat rat bang laput?

¹⁶ Kali'mu kudeng apeh laput lemibung iang langit? Ieh ineh ngaceku ileh Allah.

¹⁷ Na tu! Iko kali' ét idang mo' kareb bui macing rat pa kabing busat aco.

¹⁸ Miakké iko ngedengan Allah malad langit, idi nganau' neneh metueh mepad kudeng tekaling luk mesilo?

¹⁹ Anunké luk belén kai kuan Allah? Do' mada' nekai. Kai na kali' luk belén kai.

²⁰ Na ui mutuh Allah nima' negku pebala. Na ui pian pitayenNeh.

²¹ Idi nekini acang déi' langit pelaba rasat pad na mesier kai; idi langit malét ku bui.

²² Rasat luk mepad kudeng amas siren pa tinueh busat aco, idi rayeh Allah ngatot netau.

²³ Lalud Allah pelaba rayeh, pad tau na miak amé' muneng Neneh; Ieh megéi matu' idi mesiri kuan lemulun.

²⁴ Petulu amung lemulun matot Neneh, idi petulu Ieh na ninger bala lemulun luk ngerawé bururdeh mileh.