AYUB 36 - BALA LUK DO'

^1-2 Do' mulai niat teh, idi ninger luk belénku kuan Allah.

³ Ui nakap ileh rat mado, pad ui ngegala' siri Allah luk nemudut negku.

⁴ Amung luk belénku na mebalih; iko nier pa kiungmu seburur lemulun luk pelaba ileh.

⁵ Kudeng apeh tueh Allah! Na Ieh ngarung seburur pana'. Ieh kali' luk amung-amung.

⁶ Na Ieh nima' lun mesala' mulun mio. Ieh megéi' nganau' luk mesiri kuan lun masi'.

⁷ Ieh matar lemulun luk matu idi nima' nedeh ngimet mepad kudeng raca' pad ideh buren ruked-ruked.

⁸ Iamo' kudeng lemulun kiling idi medereh ngaceku kekamendeh,

⁹ idi Allah ngegala sala' idi dita' niatdeh.

¹⁰ Ieh mada' nedeh pad ideh ninger, idi teketed ratnan datdeh.

¹¹ Kudeng ideh maya' bala Allah idi mangun ku demulunNeh ideh do' udeng idi mekadang ulun.

¹² Iamo' kudeng ideh na ninger ideh maté ku bacédeh.

¹³ Lemulun luk na maya' Allah megéi' museh, idi kareb ideh kumin ideh na mutuh pedengan.

¹⁴ Ideh maté mangud, linaya' ku ulundeh luk dat.

¹⁵ Allah mada' lemulun bang dereh idi susa'deh.

¹⁶ Allah nemuit namu ratnan susa', idi maré namu do' udeng; idi téngmu maput ku nuba' idi kikid.

¹⁷ Iamo' nekini iko ngalap ukum luk petulu.

¹⁸ Matar do'-do' pad iko na saluken ku suap, idi aleg meraruh ku mula' binaweh.

¹⁹ Anunké ulekneh ngitang mutuh pedengan. Amung tuehmu na miak ngedengan namu nekini.

²⁰ Aleg nginulat dacem, ieh ineh kareb amung pupu miak uen ngusag.

²¹ Aleg amé' matun luk dat, derehmu mangun ku bada' pad iko na nganau' sala.

²² Ngerawé kudeng apeh rayeh laludNeh; Allah ineh guru luk meluun rayeh.

²³ Seburur pana' nateh mada' luk ruen Allah, idi mala Neneh nenganau' luk dat.

²⁴ Allah megéi' buren ngaceku kekamenNeh; do' iko pana' ngubur Neneh.

²⁵ Amung lemulun pangeh nenier luk inau'Neh; iamo' seburur pana' nateh luk kali' ilungneh.

²⁶ Tau na miak kali' rayeh Allah dengan meriput idi ngiap tuda' lak kinio ulunNeh.

²⁷ Allah ngalap abpa' rat luun tana', idi ngisu' neneh ku udan.

²⁸ Ieh maré udah ratnan laput kuan amung lemulun.

²⁹ Seburur pana' nateh luk kali' kudeng apeh laput mubuh, idi kudeng apeh lalam muni déi' langit su luk inan Allah mudeng.

³⁰ Ieh maré kilep déi' langit, iamo' ribaruh abpa' medacem.

³¹ Kudeng ini lawéNeh maman amung pupu, pad ideh inan petap akan.

³² Ieh ngakem kilep ku paladNeh, idi ngeletep su ulekneh.

³³ Lalam mada' acing barui,