AYUB 34 - BALA LUK DO'

^1-2 O meteluh luk mileh tu-tu, do' ninger luk belénku.

³ Muyuh kali' akan luk mén; ngudehké muyuh na kali' bala luk mileh?

⁴ Petulu tau mutut besara' ini.

⁵ Kebala Ayub, ieh na mesala', iamo' Allah ara' nganau' luk mesiri kuanneh.

⁶ Kebalaneh, “Kudeng apehké ui mebalih idi mala negku mesala'? Ui nurat pad lélé maté, iamo' na ui mesala'.”

⁷ Pangehké muyuh nenier lemulun luk kudeng Ayub ini atun? Na ieh ngerayeh Allah.

⁸ Ieh perurum dengan lemulun luk dat idi lun mesala' pana'.

⁹ Kebalaneh, na tu ulekneh maya' luk pian Allah.

¹⁰ Do' meteluh ngerawé! ninger luk belénku! Miakké Allah luk Melalud nganau' sala'?

¹¹ Ieh ngua' kuan lemulun maya' kekamenneh, idi ngukum nedeh maya' luk kikemdeh.

¹² Allah luk Melalud na nganau' luk dat, idi na Ieh nganau' luk na mesiri.

¹³ Inanké Allah nengalap laludNeh rat nelun baken? Inanké lemulun nengecuk Neneh ngimet tana' ini?

¹⁴ Kudeng Allah ngalap lemubed niat lemulun,

¹⁵ idi amung-amung lemulun miak maté idi misu' ku abuh teh.

¹⁶ Kudeng muyuh mileh, do' ninger balaku.

¹⁷ Inanké muyuh ngerawé Luk Melalud megatéh inan luk mesiri? Miakké muyuh ngukum Allah luk matu?

¹⁸ Allah ngukum raca'-raca' idi pengulu pana', kareb ideh dat idi kekamendeh na tabpen.

¹⁹ Allah nemudut amung-amung lemulun; na Ieh méi' nelun rayeh-rayeh idi lun do' meluun ratnan lun masi'.

²⁰ Aceh lemulun miak maté denak-denak kareb medacem. Allah necat lemulun pad ideh maté. Ieh ngaté lemulun luk metueh dengan na anun-anun.

²¹ Ieh nier anid akang lemulun.

²² Dacem pana' na miak ngapung lun mesala' ratnan Allah.

²³ Allah na ngeletep kareb, pad lemulun amé' kuminNeh.

²⁴ Na Ieh nganau' gayam atun pad Ieh nala' nelun rayeh, idi ngelibal nedeh ku lun baken.

²⁵ Ieh nala' nedeh idi ngebeneh nedeh kareb medacem, ngaceku Ieh kali' kekamendeh.

²⁶ Ieh ngukum lun mesala' su siren lun mula',

²⁷ ngaceku ideh ugka' na maya' Neneh, idi teh na maya' amung ukumNeh,

²⁸ pad lun masi' nengitang pa kiung Allah, mutuh pedengan, idi Ieh neninger putuhdeh.

²⁹ Kudeng Allah ungeng, seburur pana' nateh luk miak ngadu' Neneh. Kudeng Ieh teketed ratnan lemulun, ideh na miak nganau' anun-anun.

³⁰ Idi pupu-pupu na miak mebpeng lemulun luk dat na mangun ku raca'deh.

³¹ O Ayub, pangehké iko ngamo sala'mu pa kiung Allah, pad iko na nganau' sala' baruh?

³² Pangehké iko mutuh Allah ngegala' sala'mu, pad iko ugka' nganau luk dat?

³³ Kudeng iko ngarung pian Allah, miakké iko mutuh Neneh maya' pianmu? Do' iko ngerawé do'-do' idi ngor bala kai.

³⁴ Kali' rungen lemulun luk na mebacé ngamo balaku; idi lun mileh luk ninger balaku miak pebala,

³⁵ “Bala Ayub mebacé, idi na tu ilung balaneh.”

³⁶ Ngerawé amung bala Ayub; megala ieh pebala mepad kudeng lemulun luk dat.

³⁷ Ieh ara' ugka' ratnan sala'; ieh situnga idi ngedat Allah pa kiung tau.