AYUB 33 - BALA LUK DO'

¹ O Ayub, ninger do'-do' amung luk belénku.

² Ui pian mada' luk teruayenku.

³ Amung balaku matu, idi na ui mebalih.

⁴ Roh Allah nemudut negku, idi nemaré ulun kuanku.

⁵ Kudeng miak, do' iko ngor balaku. Do' iko temina' ku ormu.

⁶ O Ayub, pa kiung Allah kiteh mepad mo'. Kiteh dueh-dueh pinudut ratnan tana' mo'.

⁷ Na luk katotmu negku. Na ui sikal metueh rat namu.

⁸ Ini balamu luk pindengerku:

⁹ “Ui na sala. Na ui nenganau' luk dat. Ui ini matu, idi na ui nenganau' sala'.

¹⁰ Iamo' Allah nakap dalan pad Ieh ngedereh negku, mepad kudeng aceh bunu'Neh.

¹¹ Ieh ngaling kukudku, idi nier amung lawéku.”

¹² O Ayub, bang terawéku iko mesala'. Allah meluun rayeh ratnan lemulun.

¹³ Ngudehké iko ngedat Allah ngaceku Ieh na ninger adu' lemulun?

¹⁴ Sagan tu pana' Allah pebala dengan tuda'-tuda' dalan, seburur pana' nateh luk ninger balaNeh.

¹⁵ Allah pebala bang nupi idi bang luk siren kareb lemulun rudap medacem.

¹⁶ Allah nganau' nedeh ninger luk belénNeh, pad ideh matot ku bada'Neh.

¹⁷ Allah pebala pelé ideh na nganau' sala' teh, pad ideh na medita' niat.

¹⁸ Allah na nima' nedeh uan ngedereh, idi Ieh ngulun nedeh ratnan até pana'.

¹⁹ Allah maré luk mét idi luk kadan kuan lemulun, pad Ieh mada' nedeh.

²⁰ lemulun luk mét na sikal kuman, pad ieh melibo kuman luk mén.

²¹ Ieh merugu' pad tulang sigarangneh melagan.

²² Ieh lélé amé' su luk inan até.

²³ Kian melaikat amé' ngedengan neneh lek, ieh ineh seburur rat arang ribu-ribu melaikat Allah, luk nguit lemulun ngerawé ratnan kekamendeh luk petulu.

²⁴ Idi melaikat ineh méi' neneh, pad ieh pebala, “Muit neneh! Ieh na miak amé' su luk inan até. Ui pangeh nengalap luk ku nguli' neneh.”

²⁵ Idi bururneh metueh idi do' taga baruh;

²⁶ Allah miak ngua' sembayangneh; idi ieh sembayang inan Allah dengan mawang niat; Allah miak ngeperuan nenek sekua' baruh teh.

²⁷ Ieh miak tuped idi pebala, “Ui nenganau' sala'. “Ui na nenganau' luk matu, iamo' Allah méi' negku.

²⁸ Ieh nengimet negku, pad ui na amé' su luk inan até, pad ui mulun teh.”

²⁹ Allah megéi' kua' nganau kudeng ineh;

³⁰ Ieh ngulun lemulun, pad ieh mulun dengan mawang niat.

³¹ O Ayub, pirud idi ninger luk belénku.

³² Iamo' kudeng inan luk belénmu, do' iko pebala; idi ui miak ngamo namu matu.

³³ Kudeng na luk belénmu, do' pirud idi ninger balaku, ui mada' namu pad iko mileh.