AYUB 32 - BALA LUK DO'

Bala Elihu (32.1–37.24)

¹ Idi diteluh na ngua' bala Ayub teh, ngaceku ieh matu bang terawéneh sebuleng.

² Idi seburur lemulun luk ngadan Elihu pelaba useh, ngaceku Ayub ngerawé bururneh sebuleng matu, idi ieh nengesala' Allah. (Idi Elihu ineh anak Barakel, luk inul Bus, ratnan pupu Ram.)

³ Idi teh ieh museh inan teluh burur lun rurum Ayub, ngaceku ideh na mileh ngua' bala Ayub, ayu'neh Allah luk sala'.

⁴ Iamo' Elihu nima' lun baken pebala atun, ngaceku ieh luk mangud.

⁵ Iamo' kareb Elihu kali' diteluh na mileh ngor bala Ayub, idi ieh museh

⁶ pad ieh ngimun pebala. Ui matot mada' nemuyuh ratnan terawéku, ngaceku ui mangud idi muyuh mengered.

Elihu

⁷ Bang terawéku, petulu muyuh luk mengered idi mileh miak pebala.

⁸ Iamo' Roh Allah luk Melalud luk ngacing ileh kuan lemulun.

⁹ Na lemulun mileh idi kali' luk matu, ngaceku ideh mengered mo'.

¹⁰ Do' muyuh ninger balaku, pad muyuh kali' terawéku.

¹¹ Ui neninger dengan mulai niat, kareb muyuh nepebala, pian kali' ileh muyuh.

¹² Ui neninger do'-do', iamo' na muyuh pebala luk matu, idi na muyuh nengua' bala Ayub.

¹³ Kudeng apehké muyuh ngerawé muyuh inan ileh? Nima' Allah ngua' bala Ayub, ngaceku bala muyuh na matu.

¹⁴ Ayub nepebala kuan muyuh, baken kuanku, iamo' kali' rungen ui na ngua' bala Ayub maya' terawé muyuh.

¹⁵ O Ayub, na ideh mileh pebala, ideh na miak ngua' balamu.

¹⁶ Miakké ui ungeng kareb ideh pirud? Ideh tuped su ineh dengan na luk baléndeh.

¹⁷ Nekini ui miak ngor balamu, idi mada' terawéku namu.

¹⁸ Na ui tuman pirud.

¹⁹ Kudeng ui na pebala kali' rungen ui mebacit, mepad kudeng seréi' kubil luk mepanu' ku abpa' anggur luk mebaruh.

²⁰ Ui na tuman. Na miak na ui pebala.

²¹ Na ui mili' idé-idé pana' bang gayam ini; na ui pian ngacé lemulun mo'-mo',

²² Na ui mileh ngacé lemulun, idi Allah miket ngukum negku kudeng ui nganau' kudeng ineh.