AYUB 31 - BALA LUK DO'

¹ Ui nepejani', pad ui na melili ku decur.

² Anunké luk ruen Allah luk Melalud kuan tau? Idi kudeng apehké Ieh ngua' kekamen lemulun?

³ Ieh maré susa' idi dereh kuan lemulun luk nganau' sala'.

⁴ Allah kali' amung-amung luk ruenku, idi nier anid-anid akangku.

⁵ Ui na tu-tu nenganau' luk dat, idi na ui nenaluk nelun baken.

⁶ Nima' Allah nimang negku ku timang luk matu, pad Ieh kali' ui na mesala'.

⁷ Kudeng ui umai ratnan dalan luk mesiri, pad ui maya' luk dat, idi kudeng ticu'ku melutak ku sala',

⁸ do' nima' lati'ku uen ngusag, idi nima' nelun baken kuman tibuku.

⁹ Kudeng ui melili ku decur lun denganku, pad ui nganét munung tanga'neh,

¹⁰ do' nima' awanku ngelak kuan deléi baken, idi pamung rudap dengan deléi baken teh.

¹¹ Kali' rungen sala' ineh pelaba dat, pad ieh ngacing ukum maté.

¹² Ieh mepad kudeng aceh apui luk ngeseb, idi ngusag amung luk ui kuan.

¹³ Kudeng seburur demulunku mada' negku, ui megéi' ninger balaneh idi nganau' luk mesiri.

¹⁴ Kudeng na pieh kudeng ineh, kudeng apehké ui miak papu' Allah? Anunké luk belénku kareb Allah ngukum.

¹⁵ Allah luk nemudut negku, idi Ieh teh luk nemudut demulunku.

¹⁶ Na tu ui na ngedengan nelun masi' idi tinula' luk mesusa'.

¹⁷ Ui megéi maré babpat akanku kuan anak maté.

¹⁸ Ruked ulunku ui ngedengan nedeh.

¹⁹ Kudeng ui kali' seburur lun masi' luk na miak melih ayungneh,

²⁰ ui megéi' maré ayung ratnan buluh dumbaku kuanneh. Idi ieh megéi ngubur negku dengan amung niatneh.

²¹ Kudeng ui pangeh nenaluk anak maté, ngaceku ui kali' ui mileh bang besara';

²² nima' ticu'ku uen mutul, idi nima' langenku uen mubput ratnan tudungku.

²³ Na tu ui miak nganau' luk kudeng ineh ngaceku ui matot ku ukum Allah.

²⁴ Na ui merapet ku binaweh,

²⁵ idi na ui medita' niat ku ui lun do'.

²⁶ Na ui sembayang inan aco luk merasat idi bulan luk do' acang.

²⁷ Na tu ui tinutun ku luk kudeng ineh.

²⁸ Sala' luk kudeng ineh ngacing ukum maté, ngaceku na manu inan Allah luk Melalud.

²⁹ Na ui mawang niat ku dereh bunu'ku, idi ku susa'deh.

³⁰ Na ui mesala' ngediman nedeh, pad ideh maté.

³¹ Amung lemulun luk ngakem kuanku kali' ui megéi' nganak lun sakai-sakai,

³² pad lemulun luk rat mado na rudap déi' liang.

³³ Lun baken nutun ngalum sala'deh, iamo' na ui nenganau' kudeng ineh.

³⁴ Na ui matot ku bala dulun; pad ui tudo idi na mepai, ngaceku matot ku baladeh.

³⁵ Adui, idéké miak ninger balaku? Amung balaku ini matu. Do' nima' Allah luk Melalud ngor balaku. Kudeng amung adu' bunu'ku negku uen ngayud,

³⁶ amung ineh mangun ku banéku pad ineh siren lun baken.

³⁷ Idi ui mada' Allah ratnan amung-amung luk inau'ku, pad ui na migu' tuped pa kiungNeh.

³⁸ Kudeng ui nemano tana' luk inau'ku ku lati'ku rat nelun luk kuan tana' ineh,

³⁹ idi nekuman ulu'neh, pad lun luk nengisak padé ineh maté ku lau —

⁴⁰ do' nima' uduh idi tabpa' mulun ku libal padé idi ikun. Macing ieni mo' balaku.