AYUB 30 - BALA LUK DO'

¹ Iamo' nekini lemulun luk mangud rat negku situnga negku! Tamandeh na mayu ngedengan uko' luk matar dumbaku.

² Ideh pelaba laya', pad ideh na miak ngakem kuanku.

³ Ideh masi' idi melau, pad ideh kuman uat luk tekering déi' su luk ali-ali kareb medacem.

⁴ Ideh mubput idi kuman uduh déi' su luk ali-ali, idi teh uat belaban luk na mén!

⁵ Lun baken masut nedeh dengan ngitang mepad kudeng ngitang nelun luk mano.

⁶ Ideh tudo bang lubang batu, idi lubang luk inukat luun irang.

⁷ Déi' su luk ali-ali ideh ngarod mepad kudeng pung, ideh pamung liang kayuh.

⁸ Lemulun luk na mayu, idi luk na ngadan! Ideh inusu rat bang bawang.

⁹ Nekini ideh meriruh negku; idi ui luk inandeh situnga mo'.

¹⁰ Ideh megileg nier negku; ideh ngerawé ideh meluun do' rat negku; ideh ngelica' kiungku.

¹¹ Ngaceku Allah pangeh nengelaya' negku, idi ideh megateh negku.

¹² Amung lun luk dat ini ngerieng negku, ideh ngerada' negku, pad ideh ngelaya' negku.

¹³ Ideh ngabang negku pian ngaté negku; idi na lun mebpeng nedeh.

¹⁴ Ideh semuet maya' lubang libungku idi ubpa luunku;

¹⁵ pad ui pelaba tot; idi ngadanku metutu' mepad kudeng bui, idi do'ku mepalid mepad kudeng laput.

¹⁶ Idi nekini ui malé maté, idi na luk ngagka' derehku.

¹⁷ Kareb medacem tulangku mét; idi derehku na ugka'.

¹⁸ Allah ngakem dier kuyu'ku, idi mag ayungku.

¹⁹ Idi Ieh nala' negku bang buri; ui mepad kudeng arap mo'.

²⁰ O Allah, ui nawar Namu, iamo' na Iko ngor balaku; idi kareb ui sembayang, Iko na ninger.

²¹ Iko ngedereh negku, idi ngesusa' negku dengan amung laludMu.

²² Iko nima' bui malid negku; Iko luk ngedier negku bang barui luk rayeh.

²³ Ui kali' Iko naban negku amé' bang até, luk tinina' kuan amung-amung lemulun.

²⁴ Ngudehké Iko ngedereh lemulun luk melaya', idi luk miak mutuh éi' mo'.

²⁵ Naké ui nangi' dengan lemulun luk mesusa'; idi méi' kuan lun masi'.

²⁶ Ui merapet ngalap awang idi acang, iamo' susa' idi dacem mo' luk macing negku.

²⁷ Ui megagau ngaceku mula terawé idi ét; idi dereh mo' luk miak macing negku.

²⁸ Ui nalan dengan mesusa' niat idi na miak buken. Ui tuped pa kiung lun mula' mutuh pedengan.

²⁹ Ui ngarod ku dat niatku mepad kudeng uko' luk meliput luk nguang idi teh puek luk muni kareb medacem.

³⁰ Kubilku mitem; idi ui medadem.

³¹ Atun ui neninger nani luk ngawang niatku, iamo' nekini inan tido idi tangi' mo'.