AYUB 3 - BALA LUK DO'

Adu' Ayub Inan Allah

¹ Mio-mio idi Ayub nengimun pebala. Idi ieh nengediman aco luk inanneh tinganak.

Ayub

^2-3 O Allah, do' ngediman aco luk inanku tinganak, idi malem karebku pun mangun ku anak.

⁴ O Allah, do' ngisu' aco ineh mangun ku dacem, aleg ngerawé aco sineh teh; aleg nima' acang ngacang neneh.

⁵ Nganau' aco sineh meseraber idi medacem; mapen neneh ku laput idi ngelinged mateh aco.

⁶ Aleg ngiap dacem sineh bang anid lak;

⁷ nima' dacem sineh dat ali ruked-ruked, pad na luk idi awang niat bang kareb ineh.

⁸ Nima' lun ngediman aco sineh, ieh ineh lun luk mileh nawar galau.

⁹ Aleg nima' gituen pekak merasat; aleg nima' dacem ineh mangun ku acang aco.

¹⁰ Ngediman dacem ineh, ngaceku ieh na nengitek nakan tinanku, iamo' ieh nemaré negku kuan susa' idi dereh.

¹¹ Meluun do' ui naté bang nakan tinanku, idi naté karebku pun tinganak.

¹² Ngudehké tinanku nengabin negku: ngudehké ieh neniti' negku?

¹³ Kudeng ui pangeh naté kareb ineh, nekini ui miak ngato erurku,

¹⁴ idi rudap mepad kudeng raca'-raca' idi lun rayeh-rayeh luk nemudut ruma' raca' luk mon.

¹⁵ Idi teh ui miak rudap mepad kudeng anak raca' luk manu' ruma'deh ku amas idi pirak,

¹⁶ idi rudap mepad kudeng anak butung karebneh tinganak.

¹⁷ Bang tanemdeh lun luk dat ugka' nganau' kekamen luk dat, idi lun luk merur ngakem ngato erurdeh.

¹⁸ Lun luk tiban pana' ngalap awang niat, idi na nekali' arod idi ukum luk metueh.

¹⁹ Amung-amung lemulun idi déi bang tanem, lun rayeh idi anak pana', idi demulun pana' puatin.

²⁰ Ngudehké nima' lemulun mulun bang susa'? Ngudehké maré acang kuan lemulun luk medereh?

²¹ Ideh nginulat até, iamo' na ieh macing; ideh meluun pian ku tanem ratnan binaweh.

²² Na ideh mawang niat pad macing ideh maté idi tinamen;

²³ Allah ngelinged luk miak mangun muci idi ngerieng nedeh rat selipa idi rat pa selipa.

²⁴ Na ui kuman, iamo' ui temido, idi ui na miak ugka' ngarod.

²⁵ Amung-amung luk inanku matot idi merapang macing negku.

²⁶ Idi na ui miak mawang niat idi ngato erurku, idi susa'ku na tu-tu ugka'.