AYUB 29 - BALA LUK DO'

Kekiped Bala Ayub

¹ Ayub nengimun pebala teh.

Ayub

² Meluun do' ui mulun mepad kudeng ulunku luk mon kareb Allah nematar negku.

³ Allah megéi' idi denganku, idi nengacang dalanku kareb ui nenalan bang dacem.

⁴ Kareb ineh ui lun do', idi Allah nematar ruma'ku.

⁵ Allah luk Melalud idi denganku, idi teh amung anakku.

⁶ Sapi' idi amék nemaré mula' rata, idi saitunku mulun bang tana' su luk mula' batu pana'.

⁷ Kareb lun rayeh bang bawang nepegayam, ui idi dengandeh,

⁸ idi anak adi' numai kareb ideh nekali' negku, idi lun luk mengered pana' netuped pad ideh ngerayeh negku.

⁹ Idi lun luk rayeh-rayeh nepirud;

¹⁰ idi teh lun luk meluun rayeh pana' nungeng.

¹¹ Amung lemulun luk nenier negku idi luk neninger bala ratnan ui na miak na ngubur kekamenku.

¹² Kareb lun masi' nengitang, ui nengedengan nedeh. ui nengedengan anak maté luk na lun luk nengan nedeh.

¹³ Lun luk pelaba susa' nengubur negku, idi ui nengedengan decur tinula' pad ideh do' udeng.

¹⁴ Ui megéi' nganau' luk mesiri idi luk matu.

¹⁵ Ui nengedengan lun luk nebuser idi lun luk mekio'.

¹⁶ Ui mepad kudeng taman kuan lun masi', idi ui nengedengan sakai luk inan susa'.

¹⁷ Ui nengelaya' lemulun luk dat idi nemuit lemulun luk piderehdeh.

¹⁸ Ui megéi' ngerawé mulun macing ui mengered, idi maté bang ruma'ku dengan do'.

¹⁹ Ui mepad kudeng aceh lawa kayuh luk inan uat luk megéi' inan abpa', idi angatneh megéi' meba' ku ipup.

²⁰ Amung lemulun megéi' ngubur negku, idi bururku metueh peh.

²¹ Kareb ui ngubuk, amung lemulun pirud idi ninger amung luk bilaku do'-do';

²² idi na luk beléndeh kareb ui pangeh nemada' nedeh. Balaku mepad kudeng udan kuandeh;

²³ amung-amungdeh neninger dengan mawang niat, mepad kudeng lun luk inan lati' mawang niat kareb inan udan.

²⁴ Kareb ui merimud nedeh, ideh pelaba awa, kareb ideh meberat niat na ui mesusa'.

²⁵ Ui nenguyut idi nemutut amung gayam; ui nenguyut nedeh mepad kudeng aceh raca' nguyut bawehneh, idi nengubuk nedeh kareb ideh mesusa'.