AYUB 28 - BALA LUK DO'

Ileh Allah Inubur

¹ Inan lubang su luk inan ngukat pirak, idi su luk inan amas uen ngeligan.

² Lemulun ngukat belawang rat bang tana', idi ngurai tekaling rat bang batu,

³ idi nakap ineh bang su luk meluun dacem, idi bang su luk medalem, idi teh bang luk medacem ideh nakap batu.

⁴ Mado ratnan bawang idi dalan lemulun, lemulun ngukat lubang. Su ineh ideh ngakem buleng-buleng, idi maya' kalat amé' bang lubang ineh.

⁵ Padé mulun luun tana', iamo' pa liang tana' ineh amung batu mekareg.

⁶ Batu luk bang tana' inan luk mebata', idi abuh tana' inan amas.

⁷ Kanui pana' na kali' dalan luk amé' bang lubang ineh, idi na temulud pa luundeh.

⁸ Balang idi pung baken luk mesangit pana' na maya' dalan su luk ali-ali ineh.

⁹ Lemulun ngelubang batu luk metueh, idi mubuh pegkung rat su inanneh.

¹⁰ Idi kareb ideh nganau' lubang maya' pa liang batu, ideh kali' batu luk meraga.

¹¹ Ideh ngukat pad macing punang bued abpa', pad ngalap luk inapung déi'.

¹² Iamo' rat iapehké ileh luk matu? Kudeng apehké tau miak sibada' pad tau miak kali'?

¹³ Ileh na miak tekapen ratnan lemulun; seburur pana' nateh luk kali' ratnan raganeh.

¹⁴ Ribaruh abpa' idi abpa' rayeh pebala, “Na luk idi ileh su ini.”

¹⁵ Idi ileh na miak belian ku pirak idi amas.

¹⁶ Amas luk do' idi batu luk meraga na petap ku melih ileh ineh.

¹⁷ Raganeh meluun ratnan amas, idi sidangur luk ratnan amas, idi gelas luk pelaba do'.

¹⁸ Raga ileh meluun ratnan batu luk meraga luk bang abpa' rayeh, idi gelas luk meraga, idi teh batu luk mesilo idi mesia'.

¹⁹ Batu luk mebirar idi amas luk meluun do' na miak uen maad ku raga ileh.

²⁰ Rat iapehké ileh luk matu? Kudeng apehké tau miak sibada', pad tau miak kali'?

²¹ Sebuleng pudut luk mulun pana' na miak nier ineh, idi teh suit luk temulud pana' nateh kali' neneh.

²² Até idi usag pana' ngamo ideh ninger bala mo'.

²³ Allah sebuleng mo' luk kali' dalanneh, idi su luk inan ileh,

²⁴ ngaceku Ieh luk kali' iring tana', idi teh amung-amung luk pa liang langit.

²⁵ Kareb Allah nemaré lalud kuan bui, idi nengeletep kirayeh abpa' rayeh;

²⁶ kareb Allah nemili' su luk inan udan idi su dalan laput luk muni;

²⁷ idi Ieh nekali' ileh idi nenutun raganeh— Ieh nengeletep idi nengamo neneh.

²⁸ Kebala Allah kuan lemulun, “Do' muyuh matot inan Tuhan pad muyuh mileh, idi teketed ratnan luk dat, pad muyuh do' kali'.”