AYUB 27 - BALA LUK DO'

Ayub

^1-2 Ui pebulung ku Allah luk Melalud luk mulun, luk na mutut besara'ku idi luk nganau' ulunku mesusa'—

³ ruked Allah maré niat negku,

⁴ bibirku na miak pebala luk dat, idi dila'ku na miak mebalih.

⁵ Na tu ui miak mala nemuyuh matu; ruked ulunku ui mala negku matu.

⁶ Na tu ui ugka' mala negku matu; teruayen niatku do' mo'.

⁷ Nima' amung lemulun luk sikal metueh rat negku, kumin mepad kudeng lemulun luk dat luk na matu.

⁸ Anunké rapet lemulun luk na manu kareb Allah ngalap niatdeh?

⁹ Kareb inan susa' miakké Allah ninger aroddeh?

¹⁰ Petulu ideh pian ku awang luk barén Allah, idi teh petulu ideh megéi' sembayang.

¹¹ Nima' negku mada' nemuyuh ratnan kudeng apeh rayeh lalud Allah, idi ngelio luk tirawé Allah luk Melalud.

¹² Iamo' setuneh muyuh sebuleng pangeh kali', ngudehké muyuh pebala luk mebacé?

Sopar

¹³ Kudeng ini lawé Allah luk Melalud ngukum lemulun luk dat.

¹⁴ Sagan pana' ideh mula' anak, amungdeh pitayen bang bunu'; idi anakdeh na petap akan.

¹⁵ Idé-idé luk mulun miak maté ku ét, idi tinula'deh na temido butungdeh.

¹⁶ Sagan pana' lun luk dat mula' pirak, idi teh mula' ayung,

¹⁷ lun luk do' ngayung ku ayung ineh, idi lun luk mesiri ngalap pirakneh.

¹⁸ Lun luk dat mudut ruma' luk na meraben, ruma'deh mepad kudeng tebaru kelawa', idi teh lepo demulun luk matar lati'.

¹⁹ Kekipedneh, ideh miak telubid dengan binawehdeh, idi kareb ideh kulat, amung binawehdeh na idi.

²⁰ Tot macing mepad kudeng tubu' belen; ideh mepalid ku bui kareb medacem;

²¹ ideh mepalid ku bui rat pa busat aco rat su inandeh.

²² Dengan na méi', bui malid nedeh, pad ideh nutun buro.

²³ Bui muni bang laliddeh kareb ideh upun, pad ideh matot ku laludneh.