AYUB 24 - BALA LUK DO'

¹ Ngudehké Allah na ngeletep aceh kareb luk inan ngukum kuan lemulun luk maya' Neneh?

² Lemulun ngiuk lakan pad ngalap tana', idi mano dumba idi nganau' dengan dumbadeh sebuleng.

³ Ideh mano keladai anak maté, idi ngimet sapi' decur tinula' ku duduk.

⁴ Ideh na nima' nelun masi' nganau' luk petulu kuandeh, idi ngecuk nedeh upun buro idi sigapung.

⁵ Pad lun masi' nakap akan déi' su luk ali-ali, mepad kudeng keladai luk meliput, ngaceku na luk inandeh nakap akan kuan anakdeh.

⁶ Idi na miak na ideh nganau' lati' luun tana' dulun, idi ngalap bua' anggur rat bang kabun lemulun luk dat.

⁷ Karebdeh rudap ideh na tarub ku ngelau' nedeh.

⁸ Ideh meba' ku udan luun pegkung, idi ideh amé' sidakit luun batu.

⁹ Lemulun luk dat ngalap anak maté ku demulundeh, idi teh ideh ngalap anak lun masi' ku duduk.

¹⁰ Iamo' na miak na lun masi' nalan lubpa, idi ideh melau kareb ideh ngeranih kuan dulun.

¹¹ Ideh ngeradu' bua' saitun ku umau, idi bua' anggur ku abpa' anggur, iamo' ideh sebuleng meparing.

¹² Bang bawang rayeh arod lun luk nurat idi lun luk maté pedingeren, iamo' Allah na ninger sembayangdeh.

¹³ Inan lemulun luk na pian ku acang; ngaceku ideh na kali' ilungneh. Ideh ara' maya' ineh.

¹⁴ Kareb masa aco lun luk ngaté amé' ngaté nelun masi', idi kareb medacem ieh mano.

¹⁵ Lun luk pasét nginulat macep aco, idi ngebpu kiungneh pad na lun kali' neneh.

¹⁶ Kareb medacem lun luk mano umak ruma', iamo' kareb macang aco ideh sigapung idi na pian ku acang.

¹⁷ Ideh matot ku acang aco, iamo' na ideh matot ku dacem.

Sopar

¹⁸ Lemulun luk dat mened, idi tana'neh kidiman Allah; idi nekini na ieh amé' ngakem bang kabun anggurneh.

¹⁹ Mepad kudeng salju ubpa' kareb melau' idi merikan, kudeng ineh teh lun mesala' buro amé' bang tanem.

²⁰ Seburur pana' nateh luk ngerawé neneh, tinanneh pana' nateh. Ieh kenen uled, pad ieh mabud.

²¹ Amung ini mangun ngaceku ieh ngedereh decur tinula', idi na méi' kuan decur luk na anak.

²² Allah ngusag lun luk melalud dengan tuehneh. Allah necat, idi lun luk dat maté.

²³ Kudeng Allah nina' neneh lutep mulun, Ieh matar neneh kidi-kidi.

²⁴ Lemulun luk dat uen ngedita' segageh mo' idi pangeh ineh ieh mekarang kudeng uduh, mepad kudeng geramih luk linidik.

²⁵ Miakké seburur lemulun ngalum ineh? Inanké lemulun luk kali' balaku na matu?