AYUB 23 - BALA LUK DO'

Ayub

^1-2 Macing nekini pana' ui medureng inan Allah; ui na miak ugka' ngarod.

³ Ui pelaba pian kali' su inanNeh, idi kali' dalan amé' matun Neneh.

⁴ Pad ui nguit besara' ku pa kiungNeh, idi ngamo bururku.

⁵ Ui pian kali' anun luk belénNeh, idi kudeng apeh Ieh ngor balaku?

⁶ Sikalké Allah metueh rat negku? Na tu! Ieh miak ninger balaku.

⁷ Ui ini mesiri; ui miak pegayam dengan Allah; Ieh miak ngamo negku na mesala' peh.

⁸ Ui nenakap pa busat aco, iamo' na Allah idi déi'; idi na ui nekali' Neneh pa acep aco teh.

⁹ Allah pangeh nengakem pa tinueh busat aco; Ieh pangeh iné' pa kabing busat aco, iamo' nateh ui nekali' Neneh.

¹⁰ Iamo' Allah kali' anid su luk ulekku; kudeng Ieh nutun negku, Ieh kali' negku meligan.

¹¹ Ui lutep maya' dalan luk pilihNeh, idi na ui umai amé' selipa idi selipa.

¹² Ui megéi' nganau' luk duken Allah; ui maya' pianNeh, baken maya' pianku sebuleng.

¹³ Allah na misu'. Seburur pana' nateh luk miak metueh rat Neneh idi mebpeng Neneh na nganau' luk pianNeh.

¹⁴ Ieh miak ngeriput luk tirawéNeh kuanku; idi teh inan mula' terawéNeh luk kudeng ineh,

¹⁵ idi ui megegker idi matot pa kiungNeh.

^16-17 Allah luk Melalud pangeh nengusag kuu'ku. idi baken dacem, iamo' Allah luk ngatot negku, sagan tu pana' dacem ineh ngebuser matehku.