AYUB 22 - BALA LUK DO'

Gayam Luk Keteluh (22.1–27.33) Elipas

^1-2 Miakké lemulun luk mileh pana' inan ulek kuan Allah?

³ Inanké ulekneh kuan Allah, kudeng iko nganau' luk do' idi luk matu?

⁴ Na Allah mada' namu idi ngukum namu, ngaceku iko matot Neneh mo';

⁵ iamo' ngaceku iko pelaba ula' sala', idi ngaceku amung dat luk pangeh kikemmu ineh.

⁶ Kareb iko mupud baleh inan kinanakmu, iko nengalap amung ayungneh ku duduk, pad ieh lubpa.

⁷ Na iko nemaré abpa' rupen kuan lemulun luk meparing, idi akan kuan lemulun luk melau.

⁸ Iko nemakai laludmu idi ngadanmu, pad iko miak ngalap amung tana' ineh.

⁹ Iko na ngedengan decur tinula', iamo' iko nemano binaweh anak maté idi nengedereh nedeh.

¹⁰ Ngaceku ineh inan abpung libut-libutmu, pad iko matot.

¹¹ Idi palaba dacem pad iko na miak nier, idi tubu' belen mepigket namu.

¹² Naké Allah tudo bang langit luk meluun dita' idi nier gituen luk pa benehNeh, sagan tu pana' ideh luk palaba dita'.

¹³ Iamo' kebalamu, “Anun luk kali' Allah? Ieh ibpu laput—kudeng apehké Ieh ngukum netau?”

¹⁴ Iko ngerawé laput luk mitem ngelinged Neneh pad Ieh na miak nier, kareb Ieh nalan-nalan déi' iring tana'.

¹⁵ Sikalké iko maya' dalan luk bén lun luk dat?

¹⁶ Kareb nateh tarekdeh nacing ideh nened.

¹⁷ Ieh ineh lemulun luk na maya' Allah, idi na manu ku Ieh miak ngukum nedeh.

¹⁸ Iamo' Allah luk nenganau' nedeh mangun ku lun do'— ui na kali' terawé lemulun luk dat.

¹⁹ Lun luk do' mawang niat, idi lun luk na mesala' meriruh, kareb ideh nier lemulun luk dat kumin.

²⁰ Amung binaweh lemulun luk dat uen ngusag, idi amung luk ketecan uen ngeseb.

²¹ O Ayub, do' iko pedo' dengan Allah, idi aleg iko ngerawé Neneh bunu'mu. Idi iko miak ruenNeh ngeperuan.

²² Ngalap amung bada'Neh, idi nganug balaNeh bang niatmu.

²³ Do' iko lumi inan Allah dengan mebeneh niat, idi ugka' nganau' luk dat bang ruma'mu.

²⁴ Do' nala' amung amasmu bang arur luk nekeket.

²⁵ Nima' Allah luk Melalud mangun ku amasmu, idi ku pirakmu luk pebuun.

²⁶ Pad iko megéi' merapet inan Allah, idi kali' Neneh luk mangun ku lawa awangmu.

²⁷ Kareb iko sembayang, Ieh miak ngua' putuhmu, idi iko miak maya' jani'mu Neneh.

²⁸ Amung luk ruenmu miak mangun, idi acang miak ngacang su dalanmu.

²⁹ Allah ngebeneh lemulun luk medita' niat idi ngulun lemulun luk mebeneh niat.

³⁰ Ieh ngulun namu, kudeng iko na mesala', idi kudeng iko nganau' luk matu.