AYUB 21 - BALA LUK DO'

Ayub

^1-2 Do' ninger balaku; ineh mo' luk pituenku rat nemuyuh.

³ Nima' negku pebala atun, pangeh ineh muyuh miak situnga negku.

⁴ Kedaluhku ini baken dengan lemulun; petulu tu-tu ui miket pebala.

⁵ Do' nier negku. Kali' rungen iko megagap.

⁶ Kareb ui ngerawé luk pangeh nangun kuanku, ui mawa idi megegker.

⁷ Ngudehké Allah nima' nelun luk dat amé' mengered idi metueh?

⁸ Anakdeh idi mupundeh temubu' pa kiungdeh.

⁹ Allah na ngacing susa' kuan ruma'deh, idi na luk katotdeh.

¹⁰ Matu, amung sapi'deh amé' mula', idi nenganak dengan na susa'.

¹¹ Anakdeh upun idi marot mepad kudeng anak dumba,

¹² idi ngalai maya' uni giula' idi suling.

¹³ Ideh do' udeng ruked ulundeh, idi ideh maté dengan na luk mét.

¹⁴ Lun luk dat ngecuk Allah necan nedeh; kebaladeh, “Na kai pian maya' dalanMu.

¹⁵ Anunké ulekneh kai maya' Allah idi sembayang Neneh?”

¹⁶ Ideh merapet ku tuehdeh sebuleng, iamo' ui na miak ngerawé kudeng ineh.

¹⁷ Pangehké lapung lun luk dat ineh inilep? Pangehké seburur rat arangdeh pidereh? Pangehké Allah nengukum lemulun luk dat dengan useh,

¹⁸ pad ideh mepalid ku bui mepad kudeng uduh luk tekering, idi abuh luk mepalid kareb barui?

¹⁹ Kebala muyuh, Allah ngukum anak ngaceku sala' tamanneh. Na tu! Nima' Allah ngukum nelun mesala sebuleng; pad ideh kali' ineh.

²⁰ Nima' nelun mesala' mabeh ukum sala'deh sebuleng; pad ideh kali' useh Allah luk Melalud.

²¹ Kareb lemulun pangeh naté, miakké ieh ngerawé ulun anakneh?

²² Miakké lemulun mada' Allah, luk ngukum nedeh luk déi' surga pana'?

^23-24 Sebuang lemulun do' ulun pad macing maté; ideh maté dengan mawang niat idi na susa', idi ideh do; lamu.

²⁵ Lun baken na tu mawang niat; ideh mulun idi maté dengan mét niat.

²⁶ Iamo' amung lemulun maté idi tinamen, pad uled maput luundeh.

²⁷ Ui kali' amung terawé muyuh luk ngedat negku.

²⁸ Kebala muyuh, “Iapehké ruma' lun rayeh ineh, ieh ineh lemulun luk nenganau' luk dat?”

²⁹ Naké muyuh nepebala nan lemulun luk megéi amé' ngarang? Naké muyuh kali' baladeh?

³⁰ Kareb Allah museh idi ngukum lemulun, lun luk dat luk na mukumNeh.

³¹ Seburur pana' nateh luk ngadu' lemulun luk dat, idi luk ngua' amung dat luk pangeh kikemneh.

³² Kareb ieh uen mirir amé' lengutan, su luk inan lemulun matar tanemneh,

³³ ribu-ribu lemulun maya' butungneh, idi tana' luk luun bururneh pana' meran.

³⁴ Idi muyuh nutun ngubuk negku ku bala luk mebacé! Amung-amung luk bila muyuh mebalih mo'!