AYUB 20 - BALA LUK DO'

Sopar

^1-2 O Ayub, iko ngesusa' negku. Nekini ui miket ngor balamu.

³ Bala luk bilamu ngedat negku, iamo' ui kali' kudeng apeh ui miak ngua' balamu.

⁴ Naké iko kali' rat pun-pun lemulun inau' luun tana' ini,

⁵ lemulun luk dat na mio mawang niat.

⁶ Sagan tu pana' ieh mebala idi rayeh macing déi' langit,

⁷ ieh mepalid ku bui mepad kudeng abuh. Lemulun luk pekalai neneh miak ngitun, “Iapehké ulekneh?”

⁸ Ieh buro mepad kudeng nupi idi luk siren kareb medacem, idi na miak siren baruh teh.

⁹ Ieh na idi déi' su luk inanneh pekalai tudo;

¹⁰ idi anakneh miak ngelibal luk pinoneh rat nelun masi'.

¹¹ Atun bururneh do' taga idi metueh, iamo' na mio teh misu' ku abuh.

^12-13 Luk dat do' én kali'neh, ieh nganug sesuut bang tangneh pad ieh kali' énneh.

¹⁴ Iamo' bang batekneh akan ineh mepét mepad kudeng luk megalih.

¹⁵ Lun luk dat nguta' binaweh luk pinoneh. Allah ngeruat neneh rat bang batekneh.

¹⁶ Luk telenen lun luk dat mepad kudeng luk megalih, luk ngaté neneh mepad kudeng luk gitapen menipeh.

¹⁷ Na ieh mulun mio, pad ieh miak nier umau saitun, rata sapi' idi duru' tebikan luk manud mepad kudeng abpa' pana' na miak sirenneh.

¹⁸ Na miak na ieh maré lemubed amung luk ilapneh, ieh na miak mawang niat ku samal kekamenneh;

¹⁹ ngaceku ieh nengedereh idi na méi' nelun masi', idi nengalap ruma' luk pinudut dulun.

²⁰ Ieh manga, iamo' na ieh miak mebor.

²¹ Kareb ieh kuman, na luk ketecan, iamo' nekini do'neh mabud.

²² Kareb ieh pelaba do' susa' luk meberat miak ngareg neneh.

²³ Nima' neneh kuman amung luk pianneh! Allah miak ngukum neneh dengan usehNeh.

²⁴ Kareb ieh pian buro ratnan pelapet belawan, ieh miak uen ngelatik ku binor tekaling.

²⁵ Aceh ileb nemesut bururneh; papadneh luk mesilo medara', idi ieh pelaba tot.

²⁶ Amung-amung luk dinugneh pangeh inusag; apui luk na tinutud lemulun ngeseb neneh dengan amung uang tetek ruma'neh.

²⁷ Langit pana' ngegala' sala'neh, idi tana' pana' maré kali' ratnan ieh.

²⁸ Amung binawehneh miak sagen ku useh Allah luk mebura'.

²⁹ Ini kekiped lemulun luk dat, ieh ineh ukum luk barén Allah kuanneh.