AYUB 2 - BALA LUK DO'

Sétan Nutun Ni Ayub Sekua' Teh

¹ Idi kareb aco luk inan melaikat amé' papu' Tuhan sekua' teh. Sétan idi arangdeh.

² Kebala Tuhan neneh, “Rat iapehké iko?” Idi kebala Sétan, “Ui lawé-lawé luun tana'.”

³ Kebala Tuhan, “Kali'mu demulunKu Ayub? Luun tana' ineh seburur pana' nateh luk lutep idi do' mepad kudeng ieh. Ieh sembayang Negku idi na pian nganau' luk dat. Iko luk nengubuk Negku, pad Ui nenima' namu ngedereh neneh, dengan na punneh, iamo' Ayub lutep idi do' niat macing nekini.”

⁴ Kebala Sétan, “Seburur lemulun miak maré luk amung-amung pad ieh mulun.

⁵ Iamo' kudeng Iko ngedereh bururneh sebuleng, ieh miak nguyo namu.”

⁶ Idi kebala Tuhan inan Sétan, “Mo, Ayub ineh bang paladmu, iamo' aleg iko ngaté neneh.”

⁷ Idi Sétan neburo rat pa kiung Tuhan, idi ieh nenganau' puruh luun aput burur Ayub.

⁸ Idi Ayub iné' tudo iring aceh bubpun arap. Idi ieh nengalap aceh bila' sidangur pingukutneh puruhneh.

⁹ Idi kebala awan Ayub neneh, “Lutepké iko macing nekini teh? Ngudehké iko na nguyo Allah idi maté?”

¹⁰ Idi kebala Ayub, “Mebacé bala mineh! Kareb Allah maré luk do' kuan tau, tau ngalap ineh. Ngudehké tau medureng kareb Ieh maré susa' kuan tau.” Bang amung-amung susa' ineh pana', Ayub na nengedat Allah.

Lun Rurum Ayub Amé Neneh

¹¹ Teluh lun rurum Ayub, ieh ineh Elipas, luk rat bawang Teman, Bildad luk rat bawang Sua, idi Sopar luk rat bawang Nama. Kareb ideh kali' ratnan dereh Ayub, ideh pian amé' ngikak neneh, pad ideh ngubuk neneh.

¹² Kareb ideh mado rat neneh, ideh nenier ni Ayub, iamo' na ideh miti neneh. Kareb ideh kali' neneh Ayub, idi diteluh nangi' idi temido. Ideh nengerarak kuyu'deh, ngaceku ideh dat niat, idi ideh nengisak abuh iné' dita' idi teh luun uluhdeh.

¹³ Idi ideh netudo iringneh kinio tudu' aco idi tudu' alem dengan na pebala; ideh ungeng mo', ngaceku ideh kali' derehneh.