AYUB 19 - BALA LUK DO'

Ayub

^1-2 Ngudehké muyuh megéi' ngedereh negku ku bala muyuh?

³ Megéi' kua' muyuh ngedat negku, idi ngedereh negku dengan na migu'.

⁴ Sagan tu pana' ui nganau' sala', na muyuh mét ku ineh.

⁵ Muyuh ngerawé nemuyuh meluun do' rat negku, idi ngerawé susa'ku ini mangun ku tanu' sala'ku.

⁶ Naké muyuh kali' Allah luk nenganau' ini? Ieh nengakem negku bang abpungNeh.

⁷ Ui ngitang ngaceku Allah munu' negku, iamo' na lun ninger. Ui ngitang, iamo' na lun luk mutut ukum luk mesiri kuanku.

⁸ Allah nengitek dalan kuanku, pad ui na nalan petacu; Ieh nenganau' dalanku medacem.

⁹ Ieh pangeh nengalap amung binawehku idi teh Ieh nengedat ngadanku.

¹⁰ Ieh necat negku rat selipa idi rat pa selipa. Ieh mubput uat rapetku, pad ui mekarang idi maté.

¹¹ Allah museh negku idi munu' negku mepad kudeng bunu'Neh luk pelaba dat.

¹² Ieh ngecuk bawehNeh munu' negku; ideh ngukat lubang idi ngerieng lepoku.

¹³ Allah nematad kinanakku rat negku; ui mangun ku pupu baken kuan lun luk pekalai negku;

¹⁴ pupuku idi rurumku pangeh neburo.

¹⁵ Sakai luk tudo bang ruma'ku mekelupan negku; decur luk dukenku ngerawé negku lun pupu baken.

¹⁶ Kareb ui nawar demulunku, na ieh ngor balaku, sagan pana' ui metueh mutuh pedengan.

¹⁷ Awanku na tuman ku buen niatku; idi kinanakku sebuleng na pian amé' muneng negku.

¹⁸ Anak-anak pana' meriruh idi situnga negku.

¹⁹ Lun rurumku luk muneng megileg nier negku; lun luk inanku meluun awa neteketed rat negku.

²⁰ Kubilku ketecan luun tulangku; idi ui lélé maté.

²¹ Muyuh ineh lun rurumku! Do' muyuh méi' negku! Allah pangeh nenecat negku.

²² Ngudehké muyuh ngerada' negku mepad kudeng Allah? Naké petap dereh muyuh negku?

²³ Ui pelaba pian ku amung balaku ini uen ngayud bang surat;

²⁴ idi uen ngarit luun batu macing ruked-ruked.

²⁵ Iamo' ui kali' inan Lun déi' langit luk miak ngulun negku.

²⁶ Sagan tu pana' kubilku melu, bang bururku ini ui miak nier Allah.

²⁷ Ui miak nier Neneh dengan matehku sebuleng, idi na Ieh mado rat negku. Ui pelaba laya' ngaceku bala muyuh,

²⁸ “Kudeng apehké tau miak ngedereh neneh?” Muyuh nenakap dalan pian munu' negku.

²⁹ Iamo' nekini, do' muyuh matot ku pelapet luk ngacing useh Allah pa luun sala', pad muyuh kali' inan lun luk mutut besara'.