AYUB 18 - BALA LUK DO'

Bildad

^1-2 O Ayub, idanké iko pirud? Kudeng iko pirud, kai miak pebala namu.

³ Ngudehké iko ngerawé nekai mebacé mepad kudeng sapi'?

⁴ Iko ngedereh bururmu sebuleng mo' ku usehmu. Miakké tana' ini mangun ku su luk ali-ali ngaceku iko? Miakké pegkung mubuh ngaceku iko?

⁵ Lapung lun luk dat miak uen ngilep, pad ieh na mulun.

⁶ Lapung luk bang leponeh miak mekilep.

⁷ Atun lawéneh do', iamo' nekini ieh mekio'. Ieh mebpeh ku ilehneh sebuleng.

⁸ Ieh nalan, idi kukudneh mekaneh ku abpung,

⁹ idi teh tumidneh mekaneh abpung teh.

¹⁰ Aceh abpung teh ruen temina' kuanneh, ieh ineh su dalanneh.

¹¹ Libut-libutneh inan luk katot; ieh maya' anid akangneh.

¹² Atun ieh lun do', iamo' nekini ieh melau; dereh tuped iringneh idi nginulat neneh.

¹³ Aceh ét luk mebura' maput luunneh, pad langen idi kukudneh melu.

¹⁴ Ieh tila' rat bang lepo luk inanneh do' udeng, idi rinuid iné' matun Raca' Até.

¹⁵ Nekini idé-idé pana' miak tudo bang leponeh— kudeng ieh pangeh binubpur ku ubat atun!

¹⁶ Uat idi angatneh netekering.

¹⁷ Na ieh mebala déi' ruma'neh idi mado pana'; idi na ieh uen ngerawé teh.

¹⁸ Ieh uen ngusu rat bang bawang lun luk mulun idi rat bang acang amé' inan dacem.

¹⁹ Na inulneh, idi bang ruma'neh seburur pana' nateh luk miak mulun.

²⁰ Rat pa busat aco macing pa acep aco lemulun luk ninger ratnan ukumneh megegker idi matot.

²¹ Ini ukum kuan lemulun luk dat, ieh ineh lemulun luk na mawa inan Allah.