AYUB 17 - BALA LUK DO'

¹ Tarekku malé macing. Mabud niatku; tanem mo' luk nganét negku.

² Ui nier lemulun situnga negku.

³ O Allah, do' manu ku balaku. Na ui mebalih. Na lun baken luk miak ngedengan negku.

⁴ Iko pangeh nenganau' nedeh mebacé; aleg nima' nedeh medita' niat nier negku nekini.

⁵ Baladeh mon, kudeng selemulun masui lun rurumneh, kali' rungen anakneh uen ngedereh.

⁶ Idi nekini ideh makai bala ineh pad ngadu' negku, lemulun luk ninger ineh amé' ngelica' kiungku.

⁷ Ui lélé mebuser ku susa'ku; langen idi kukudku merugu' mepad kudeng aca'.

⁸ Lemulun luk ngerawé bururdeh matu megagap, idi ideh mala negku na manu.

⁹ Lemulun luk ngerawé bururdeh do', iuk ngerawé bururdeh matu.

¹⁰ Iamo' kudeng amung-amungdeh tuped pa kiungku, seburur pana' nateh luk mileh kali'ku.

¹¹ Tarekku malé macing; luk pangeh tirawéku na mangun, idi na rapetku.

¹² Iamo' lun rurumku mala dacem mangun ku acang idi acang ineh muneng, iamo' ui lakat teh tudo bang dacem.

¹³ Sebuleng mo' rapetku, ieh ineh até su luk inanku telubid bang dacem.

¹⁴ Ui miak neten tanem ineh tamanku, idi uled luk kuman bururku tetanen tinan idi kinanakku luk decur.

¹⁵ Iapehké aceh rapet kuanku? Idéké miak nier aceh rapet kuanku?

¹⁶ Rapet na miak maya' negku, kareb ui amé' su luk inan até.