AYUB 16 - BALA LUK DO'

Ayub

^1-2 Ui pangeh neninger bala luk kudeng ineh atun; ui na tuman ku ubuk muyuh.

³ Pianké muyuh pebala macing ruked-ruked? petuluké muyuh megéi' mutut gayam tau?

⁴ Kudeng muyuh ngelibal negku, idi ui ngelibal nemuyuh, ui miak mala luk bila muyuh, ui miak ngeguling uluhku, idi ngereb nemuyuh ku bala luk mula'.

⁵ Ui miak ngetueh nemuyuh ku bada'ku, pad ui ngubuk nemuyuh.

⁶ Sagan pana' ui pebala, na étku amé' do'; kudeng ui ungeng, ui mepad mo'.

⁷ O Allah, Iko pangeh nengelaya' negku; iko nenima' uang tetek ruma'ku pitayen.

⁸ Iko pangeh nengakem negku. Iko ineh bunu'ku; pad ui pelaba rugu', pad lemulun ngerawé ineh mangun ku tanu' sala'ku.

⁹ Dengan usehNeh Allah ngerarak negku, Ieh nutong negku dengan megateh niat.

¹⁰ Lun situnga negku; ideh ngerieng negku idi mepag pingitku.

¹¹ Allah pangeh nemaré negku bang palad lun luk dat.

¹² Kareb ui do' udeng Allah nemarek negku, idi nemabpet negku idi nengelaya' negku, Ieh nganau' bururku mangun ku aceh luk badilin.

¹³ idi ngelatik negku rat selipa idi rat pa selipa, idi ilebneh nebpek idi ngurat negku; iamo' na Ieh méi' negku.

¹⁴ Ieh megéi' ngurat negku idi munu' negku, mepad kudeng lun pebunu' luk meruden ku gateh niatneh.

¹⁵ Ui temido idi nacung idi ui tudo luun abuh idi tekeradung.

¹⁶ Ui pangeh nenangi' pad matehku mebara' idi mitem,

¹⁷ iamo' nateh ui nengedereh nelun, idi sembayangku pa kiung Allah matu.

¹⁸ O Tana', aleg ngapung sala'deh negku! Idi aleg nima' arodku uen ngagka'!

¹⁹ Déi surga inan lun luk nekali' negku, luk ngedengan negku.

²⁰ Ui mutuh Allah nier abpa' matehku, idi teh ninger sembayangku.

²¹ Ui nakap lun luk ku gatumku pa kiung Allah, luk miak mutuh kuanku mepad kudeng lun rurum.

²² Tarekku malé macing, idi ui na miak lemubed peh.