AYUB 15 - BALA LUK DO'

Gayam Luk Kedueh (15.1–21.34) Elipas

^1-2 Bala mo'-mo' ineh, Ayub! Bala mo'-mo'!

³ Lun luk mileh na pebala kudeng ineh idi mala bururneh matu dengan bala luk mo'-mo'.

⁴ Iko mebpeng nelun baken na matot inan Allah, idi mebpeng nedeh na sembayang pa kiungNeh.

⁵ Sala'mu sebuleng luk ngacing balamu ineh, idi iko naluk dengan balamu.

⁶ Baken ui luk ngukum namu; iamo' balamu sebuleng luk ngukum namu.

⁷ Ikoké lemulun luk pun-pun tinganak? Iko idi kareb Allah nenganau' pegkungké?

⁸ Inanké iko nekali terawé Allah? Iko sebuleng mo' luk milehké?

⁹ Nateh iko meluun ileh rat nekai.

¹⁰ Kai nengalap ileh kai rat nelun luk mebuda' abpuk, ieh ineh lun luk tinganak kareb nateh tamanmu mulun.

¹¹ Allah pian ngubuk namu, ngudehké iko na pian. Kai nepebala kuan Allah dengan bala luk do'.

¹² Iamo' iko megateh niat pad iko museh nier nekai.

¹³ Iko museh inan Allah pad iko ngedar Neneh.

¹⁴ Inanké lemulun luk meligan? Inanké lemulun luk matu pa kiung Allah?

¹⁵ Allah na merapet inan melaikatNeh pana'; ideh pana' na meligan pa kiungNeh.

¹⁶ Idi lemulun ngirup luk dat mepad kudeng abpa'; matu lemulun pelaba dat idi na mayu.

¹⁷ O Ayub, do' ninger bada'ku.

¹⁸ Lun mileh nemada' negku luk matu, luk pangeh bida' tepundeh, idi na luk inalumdeh negku.

¹⁹ Na pupu baken bang bawangdeh ineh, luk miak ngeraruh nedeh ratnan Allah.

²⁰ Lun luk dat luk ngedereh nelun baken miak medereh ruked ulunneh.

²¹ Uni luk katot miak pedingerenneh, idi lun mano macing karebneh do' udeng.

²² Ieh na merapet miak mepuit ratnan dacem, ngaceku pelapet nginulat sikal ngaté neneh;

²³ idi suit nginulat sikal kuman butungneh. Ieh kali' dacem macing kuanneh muci.

²⁴ Susa' idi dereh sikal ngelaya' neneh, mepad kudeng aceh raca' luk melalud.

²⁵ Ieh ineh kekiped lemulun luk nicuk kiung Allah, idi luk sikal metueh ratnan luk Meluun Melalud.

^26-27 Lemulun ineh medita' niat idi sikal metueh; dengan metueh niat ieh ngimet utapneh, idi upun munu' Allah.

²⁸ Ieh ineh lemulun luk nengaro bawang luk rayeh, idi nengalap ruma' luk ticandeh. Iamo' bawang idi ruma' ineh miak uen ngusag bang bunu'.

²⁹ Na ieh mio mangun ku lun do', idi binawehneh na lutep neneh. Aca'neh pana' miak metutu',

³⁰ idi na ieh miak mepuit ratnan dacem. Ieh mepad kudeng aceh kayuh; angatneh miak sabpen, idi busakneh mepalid ku bui.

³¹ Kudeng ieh mebacé idi merapet ku luk dat, luk dat mo' luk lapenneh.

³² Kareb nateh tarekneh macing ieh melayu, mepad kudeng angat luk na miak nginulih.

³³ Ieh mepad kudeng bua' anggur luk merurug, kareb nateh ideh melak, idi mepad kudeng saitun luk na kebua'.

³⁴ Na luk idi inul kuan lemulun luk na manu; idi ruma' lemulun luk ngalap suap miak sabpen.

³⁵ Ini lemulun luk ngerawé nganau' luk dat; idi niatdeh panu' ku saluk.