AYUB 14 - BALA LUK DO'

¹ Amung lemulun inan ulun luk mekamu' idi mesusa'.

² Ideh temubu' idi mekarang mepad kudeng busak; ideh na idi mepad kudeng aca'.

³ Miakké Iko nier negku, Allah, idi ngukum negku pa kiungMu?

⁴ Luk meligan na miak remuat ratnan luk melutak kudeng lemulun.

⁵ Kikadang ulundeh pangeh pinutut atun— idi teh kinio bulan ideh mulun. Iko nemutut ineh, pad ieh na uen ngisu'.

⁶ Do' Iko teketed ratnan lemulun idi necan nedeh; pad ideh ngakem dengan mawang niat.

⁷ Inan rapet kuan kayuh luk pangeh tibpeng; ieh miak nginulih baruh.

⁸ Sagan tu pana' uatneh amé' mengered idi tuedneh melu bang tana',

⁹ kudeng ineh uen mubpur ku abpa' ieh miak nginulih mepad kudeng luk tinibu.

¹⁰ Iamo' lemulun maté, idi ineh kekipedneh; ieh maté, idi amé' iapehké ieh?

¹¹ Arur mekeket, idi abpa' rayeh pana' tekering,

¹² iamo' lun naté na miak tumui. Ruked inan langit, na ideh miak kulat, idi teh ideh na sigio.

¹³ Ui pian ruenMu ngapung mulun bang su luk inan lun naté; nima' negku uen ngapung, pad usehMu manud, idi ngeletep aco luk inanMu ngerawé negku.

¹⁴ Kudeng aceh lemulun maté, miakké ieh tumui? Iamo' ui nginulat kareb luk meluun do', kareb susa' ini pangeh pelaba.

¹⁵ pangeh ineh Iko miak nawar negku idi ui ngor balaMu, idi Iko mawang niat negku luk pinudutMu ineh.

¹⁶ Idi Iko miak nier anid-anid akangku, iamo' na Iko pian ngiap sala'ku.

¹⁷ Iko maré do' ratnan sala'ku idi nala' nedeh. Iko ngiu' amung-amung dat luk pangeh kikemku.

¹⁸ Pegkung miak meturan idi pegkung batu miak mubuh.

¹⁹ Abpa' nganau' batu mesalud, idi udan luk mula ngeruru' tana'; kudeng ineh teh Iko nala' rapet lemulun.

²⁰ Iko ngelaya' lemulun, pad ieh na idi; kiungneh nisu' karebneh maté.

²¹ Anakneh buren, iamo' na ieh kali', idi na ideh mada' neneh kareb ideh uen ngigu'.

²² Ieh kali' étneh sebuleng mo', idi susa' niatneh.