AYUB 13 - BALA LUK DO'

^1-2 Amung-amung luk belén muyuh, ui pangeh neninger atun. Ui kali' ilung amung ineh. Ui mepad ileh nemuyuh. Na ui meluun bacé rat nemuyuh.

³ Iamo' balaku ini kuan Allah, baken kuan muyuh; ui pian besara' pa kiungNeh.

⁴ Muyuh ngapung bacé muyuh ku balih muyuh, mepad kudeng lun luk ngubat, luk na miak ngedo' seburur pana'.

⁵ Aleg pebala anun-anun, pad lun baken ngerawé nemuyuh mileh!

⁶ Ninger muyuh adu'ku.

⁷ Ngudehké muyuh mebalih? Miakké balih muyuh ngedengan Allah?

⁸ Petuluké muyuh ngelibal Allah? Miakké muyuh mangun ku lun luk mutut besara' kuanNeh?

⁹ Kudeng Allah nier nemuyuh, miakké Ieh kali' luk do' bang niat muyuh? Miakké muyuh naluk Allah, mepad kudeng muyuh naluk lemulun?

¹⁰ Sagan pana' muyuh ngadu' negku ku libal Allah, Ieh miak ngukum nemuyuh.

¹¹ idi lalud Allah miak ngatot nemuyuh.

¹² Ui musam ninger ua' bala muyuh luk rat mon ineh?

¹³ Do' pirud pad ui miak pebala, na mekudeh ratnan anun luk mangun kuanku kareb ui pebala.

¹⁴ Ui temina' maré ulunku.

¹⁵ Na luk ku rapetku, nima' Allah ngaté negku. Ui pian besara' pa kiungNeh.

¹⁶ Kian, ui miak uen ngulun ku kuu'ku lek, ngaceku lun luk mesala' na mekuu' papu' Allah.

¹⁷ Do' ninger negku ngegala' balaku.

¹⁸ Ui temina' besara' pa kiungNeh, ngaceku ui kali' ui luk matu.

¹⁹ O Allah, pianké Iko ngadu' negku? Kudeng pieh kudeng ineh ui miak pirud idi maté.

²⁰ Nima' negku mutuh dueh luk pituen. Maré ineh pad ui na sigapung rat Namu:

²¹ aleg ngukum negku, idi ngatot negku.

²² O Allah, Iko pebala atun, idi ui ngor balaMu. Kian, nima' ui pebala lek, idi Iko ngor balaku.

²³ Anunké datku idi sala'ku? Anunké kekamenku luk dat?

²⁴ Ngudehké Iko sigapung rat negku. Ngudehké Iko mangun ku bunu'ku?

²⁵ Pianké Allah ngatot negku? Ui mepad kudeng don mo'. Iko sikal metueh ratnan aceh uduh luk tekering mo'.

²⁶ Iko nguit adu' luk dat kuanku, ratnan luk inau'ku karebku anak pana'.

²⁷ Iko ngaling kukudku; Iko nier amung akangku idi lengayanku pana'.

²⁸ Idi ui uen ngareg mepad kudeng kayuh luk merapuk, idi teh mepad kudeng kuyu' luk kinan kutang.