AYUB 12 - BALA LUK DO'

Ayub

^1-2 Matu, muyuh mangun ku tang lun mula'. Kareb muyuh maté, ileh pana' maté dengan muyuh.

³ Ui pana' mileh kudeng muyuh; na ui meluun bacé rat nemuyuh; amung lemulun kali' amung luk pangeh bila muyuh.

⁴ Lun rurumku pana' situnga negku nekini; ideh meriruh, sagan tu pana' ui ini matu idi na mesala'. Iamo inan aceh kareb Allah nengua' sembayangku.

⁵ Muyuh na inan susa', iamo' muyuh situnga negku; muyuh necat lemulun luk malé mebpeh.

⁶ Iamo' lun mano idi lun luk na manu na inan susa', sagan pana' tuehdeh sebuleng mangun ku allahdeh.

⁷ Suit idi pung pana' miak mada' namu;

⁸ mutuh ileh ratnan pung luk luun tana' idi bang abpa'.

⁹ Amung-amungdeh kali' ticu' Tuhan nemudut nedeh.

¹⁰ Allah ineh luk ngimet ulun amung pudutNeh, idi ulun amung lemulun bang paladNeh.

¹¹ Iamo' mepad kudeng dila' nutun én luk kenen, kudeng ineh teh lalidmu pian ninger bala.

^12-13 Lun luk mengered inan ileh, iamo' Allah inan ileh idi lalud. Lun luk mengered do' kali', iamo' Allah do' kali' idi melalud nganau' luk amung-amung.

¹⁴ Kudeng Allah ngusag, idé luk miak nuneb, idi idéké luk muit nelun luk tetupin Allah?

¹⁵ Inan rikan kareb Allah na maré udan; inan ereb kareb Ieh maré abpa'.

¹⁶ Allah ineh mileh idi megéi' metueh, lun luk naluk idi lun luk saluken idi pa liang imet Allah.

¹⁷ Ieh ngusag ileh lun luk ngimet, idi nganau' lun rayeh nganau' luk mebacé.

¹⁸ Ieh nala' raca'-raca' idi naban nedeh.

¹⁹ Ieh ngebeneh imam idi lun luk metueh ngimet.

²⁰ Ieh nganau' nelun luk inan merapet pirud, idi ngalap ileh rat nelun luk mengered.

²¹ Ieh ngigu' lemulun luk ngimet idi ngagka' tueh raca'-raca'.

²² Ieh maré acang kuan su luk medacem mepad kudeng até.

²³ Ieh nganau' pupu metueh idi rayeh, iamo' Ieh ngelaya' idi ngusag nedeh teh.

²⁴ Ieh nganau' nelun rayehdeh mebacé', idi nima' nedeh lawé-lawé déi' su luk ali-ali,

²⁵ ideh ngakap-ngakap luun dacem mepad kudeng lun luk mabuk.