AYUB 11 - BALA LUK DO'

Sopar

^1-2 Naké lemulun ngua' bala luk mebacé ini? Miakké seburur lemulun ruen matu ngaceku balaneh mula'?

³ O Ayub, iko ngerawé kai na miak ngua' balamu. Miakké balamu luk situnga ineh nganau' nekai mebagkeh?

⁴ Iko mala luk bilamu ineh matu. Iko mala iko meligan pa kiung Allah.

⁵ Ui pelaba pian ku Allah ngua' balamu!

⁶ Ieh miak mada' namu ratnan ieh luk inalum. Inan luk meluun dalem ratnan ileh lemulun. Allah na ngukum namu maya' luk petulu.

⁷ Miakké iko kali' lakan lalud idi rayeh Allah?

⁸ Langit na lakanneh kuan Allah, iamo' ieh meluun ado rat namu. Allah kali' su luk inan até, iamo' na iko kali' ineh.

⁹ Lalud Allah meluun rayeh ratnan tana' ini, idi teh meluun rayeh ratnan abpa' rayeh.

¹⁰ Kudeng Allah ngakem namu, idi nguit namu amé' besara', idéké miak ngagka' Neneh?

¹¹ Allah kali' lemulun sapeh luk na mayu; Ieh kali' amung-amung kekamendeh luk dat.

¹² Lun luk mebacé miak amé' mileh, kareb keladai luk meliput amé' melayo.

¹³ O Ayub, nganau' niatmu matu. Ngiding ticu'mu pa kiung Allah.

¹⁴ Nala' sala' idi luk dat rat bang tetek ruma'mu.

¹⁵ Pad iko miak tukag dengan na migu', idi lutep dengan na merapang,

¹⁶ pelé amung susa'mu na teruayen peh; mepad kudeng ereb luk nepangeh,

¹⁷ pad ulunmu meluun rasat ratnan muned aco, idi dacem misu' mangun ku acang.

¹⁸ Idi iko do' udeng idi panu' ku rapet. Allah miak matar namu idi ngato erurmu.

¹⁹ Na iko matot inan bunu'; idi mula' lemulun miak mutuh pedengan rat namu.

²⁰ Iamo' lun luk dat miak lemiget dengan na merapet, idi kali' na luk idi dalan mepuit. Ideh merapet ku até mo'.